سکندر خان سکندر

سکندر خان سکندر سرائیکی زبان دے ہک ٻہوں وݙے مرثیہ گو شاعر گزرن۔ انھاں کوں سکندر پنجابی وی ہندوستان وچ سݙیا ویندا ہئی۔ گلشنِ بے خار ‘ دریائے لطافت ‘ آبِ حیات تے تاریخ ادب اردو رام بابو سکینہ وچ سکندر دے ول ول تذکرے ہن۔ (ایندی تفصیل اساں سرائیکی مرثیے دے ضمن وچ ݙے آیوں) سکندر وݙی عمر پاتی ہئی۔ او اورنگ زیب دے شاہی ویلے زندہ ہئی۔ سکندر ہک صوفی مشرب بزرگ ہا۔

بی بی صغرا پیو دے غم وچ رو رو حال ونڄایا

کھڑی رہی چوکھٹ دے اتے اندر پیر نہ پایا

گودی لے کے اُمِ سلمہ اندر آ بٹھلایا

ہنجوں پونجے چھاتی لاوے ڳالھیں کر سمجھایا

نہ رو میݙی لاڈلی ہنجوں بھر بھر نین

صبح شام کوں آ ویسی تیرا باپ حسینؑ  

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان