سُراخی
اللہ ودھایا دھریجہ تے اوندے پُتر جام مہینوال دھریجہ تے جام غلام قادر وی پیرے دی پچھاݨ رکھدے ہَن ،کتھئیں چوری چکاری تھیوے ہا تاں پرے پرے توں ہنائیں کوں لوک چا ویندے ہَن ،جام اللہ ودھائے کوں چھڑا پیر دی پچھاݨ نہ ہئی او چوریں دی رڳ رڳ کوں سمجھدے ہَن تے چوری دا ہر بھید ڄاݨدے ہَن ۔ وستی ءِچ سَندھ لڳدا ہئی تاں ݙیکھ تے آکھ ݙیندے ہَن جو اے چوری ݙس دی چوری اے ،تے آکھو دے بغیر کینھی تھئی۔پیرا چور دے گھر تئیں پُڄا تے آکھدے ہَن پیر بھیٹ کرائو چور دی نلی میں پکڑیساں ۔او آہدے ہَن جو وُہر پچھی تے نال وَلے ، پلتھی مار تے ٻہہ تھیوے ۔ نیاں تھیسے چور کُھرا اَڳوں تے کڈھ ݙیسن یا چوری ݙیسن ۔ویگی وی کائنا گھنسوں ۔ اصل مال گھنسوں ۔ہک واری خشکیں آلے پاسے پیرا چا ڳیوسے تاں اُنہاں پُچھیا جو گھر ءِچ تے گھر دے ٻاہروں چوریں دے پیر کڄن وے ،اَدے بَلی آکھیا جو اساں تاں بھڄدے آیوں ۔ ڄام مہینوال آکھیا جو اے تاں اَڳوں دوڑ تے پچھوں چوڑ آلا کم اے ۔بَلی دھریجہ ݙاڈھا تکڑا ہا ،اساݙی چوری اوکھروند کر ڳے ہَن پیراں اُنہائیں دے دَر تے کھڑایا ہَس ۔چوری دا مال رڑھ ءِچ لُکائی کھڑے ہَن ۔ چور آکھن چوری اَساں کینھی کیتی ،کٹھ کرو اَساں صفائی ݙیندوں ۔اَدے بَلی آکھیا اِتھاں تریاکل آلی ڳالھ کینھی یا چوری ݙیو یا پیرا ٹورو ۔ اَنت ہُنائیں کوں چوری ݙیوݨی پی۔اساں ہُنائیں کوں پکڑوایا تے چور چوری کنوں توبہ کر ڳے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان