سَّسی دی ماڑی

بھٹہ واہݨ وچ ہک ݙو منزلہ مگر خستہ عمارت اے جیں دے وچ سَسی جمی ہائی۔شہر بھٹہ واہݨ زمین دے ابھار تے بنڑیا ہویا اے۔آوݨ آلے کوں پرے کنوں اے ماڑی نظر امدی اے۔ایںعمارت وچ تخریب دا عمل تیزی نال جاری ءِ۔اگر کجھ ناں کیتا ڳیا تاں چند سالاں وچ اے عمارت ختم تھی ویسی۔ایں ماڑی کنوں کوئی ڈیڑھ میل دے فاصلے تے نشیبی علاقہ اے۔جتھاں پراݨی سلھاں نال پوڑیاں بنڑیاں ہویاں ان۔نال جیڑھا زمین دا نشیبی علاقہ اے او ست سو سال پہلے وہݨ آلے دریا دے پاٹ داثبوت اے اتے پوڑیاں اے یاد ݙویندن کہ سسی کوں ایں دریا دے موجاں دے حوالے کیتا ڳیا ہا۔ایں نسبت نال اے جاہ سسی دی ماڑی مشہور اے۔عام کہاوت اے جو بھٹہ واہݨ وچ ہک خاص مقام اتے جیڑھی وی چھوکری پیدا تھیسی اُو سسی دی محبت وچ سرشار ہوسی اتے جیڑھا وی چھوکرا جمسے اُو تاریخ دے ݙو عظیم کرداراں ابو الفضل اتے فیضی جتنا سیاݨا ہوسی۔کیونجو انہاں تاریخی کرداراں دا تعلق وی ایں قصبہ نال ہا۔بھٹہ واہݨ ،صادق آباد کنوں اٹھ کلومیٹر فاصلے تے ہے۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء