سَو کوہ دا وَلا مار تے مِلیّن

سیاݨے آکھ ڳن تے سچ آکھ ڳن جو کہیں بندے دی شکل ݙیکھ کراہیں اوندے بارے کوئی رائے نہ ݙیو ‘ شکلاں اکثر دھوکہ ݙیندین اَتے کئی چِٹے اندر دے کالے ہوندن ۔ بندے دی صحی سُنڄاݨ تے پچھاݨ ہوں ویلھے تھیندی اے جیرھے ویلھے او اَلیندے ٻولیندے تے ڳالھ مہاڑ کریندے‘ رڑھ رہکی کرݨ آلے رہک ‘ زمیندارہ کرݨ آلا زمیندار ‘ پڑھاوݨ آلا ماسٹر ‘ وعظ کرݨ آلا مولوی ‘ ونڑج وَپار کرݨ آلا وپاری ‘ ڳوہ ڳہݨے گھنݨ آلا سُنارا ‘ لوہارکا کم کرݨ آلا لوہار ‘ اُساری کرݨ آلا مستری ‘ درکھاݨ ‘ رَمل مَارݨ آلا رملی ‘ پھالاں پاوݨ آلا جوسی ‘ جِن بھوت کڈھݨ آلا بھوپا ‘ نانگ وَٹھݨ آلا جوڳی ‘ نانگ وٹھونہے دے ݙنگیے دی وِس چُوپݨ تے مُندرݨ آلا مَاندرا ‘ بھولوںباندر نچاوݨ آلا فقیر ‘ تھاں تِھپی بݨاوݨ آلا کُمبھار‘ ٻیڑی ٹھیلݨ آلا مُہاݨا ‘ کُنڈھے چھڄ کھاریاں ‘ کھارے ‘ پلے‘ پلیاں ‘ چھپر تے تپلاں ٻدھݨ آلا کُٹاݨا ‘ ڈھور ڈھانڈے تے زناور رکھݨ آلا دولتی ‘ مینھیں تے ڳنویں چَراوݨ آلا دھݨوال ‘ ٻکریاں ‘ بھیݙاں چراوَݨ آلا آجڑی ‘ کوس دا مَال کوہݨ تے مسادی پَاوݨ آلا قصائی ‘ ٻالیں دیاں سُنتاں کرݨ آلا پرائینہیں‘ یا سیرباں کرݨ آلا نائی ‘ تاݨی تے کپڑا وَݨݨ آلا پؤلی ‘ چم دے کُھسے تے جُتیاں سیوݨ آلی موچی ‘ کپڑے سیوݨ آلادرزی‘ ݙاکے مَارݨ آلا ݙاکو ‘ وَڈھی کھاوَݨ آلے تے چٹی دلال ‘ تماشبین تے بھیٹو ‘ دِھی بھیݨ دی بھاڑ کھاوَݨ آلا بھڑوا ‘ ولیݨا کرݨ آلے دَلّے تے کنجھر ‘ ایہے سبھے تے آپو آپݨے نویکلے کم کسب آلے ٻے لوک جیرھے ویلھے ڳالھ مہاڑ کریندن ۔ ایجھے لوک ‘ ایجھیاں اَکھاݨاں تے ایجھے پہاکے ورتیندن ‘ جنہیں کوں انہیں دی اصلیّت ظاہر تھی ویندی اے ‘ خاص طور تے وَکھری ٹائپ دے بندے تاں ٻہوں جلدی سُݨیج پَمدن۔

اَڄ اسیکوں ایہے ڳالھیں اِیئیں چیتے آئن جو اساں اُردو دی ہک اخبار اِچ ہک وزیر شیخ رشید تے جماعت اسلامی دے ہک لیڈر لیاقت بلوچ ایم این اے دی آپت اِچ ڳالھ مہاڑ ‘ یا ایئیں آکھ خاطے بازی بارے چھپی ہوئی خبر پڑھی اے‘ شیخ رشید ہوریں خیر نال وݙے مشہور بندے اِن ‘ راولپنڈی آلے انہیں کوں شیدا ٹلی سݙیندن اُوئیں ڳالھوں جو ایہ فلمیں دی منادی کرݨ آلیں دے نال ٹُردیں ہوئیں ٹلی وَڄیندے ہن ‘ جئیں اپݨے شہر خان پور اِچ بہشتی اللہ بخش کھنڈی وَڄیندا ہا ‘ او ہِک ٻے لیکھے دی مشہور ہن ‘ جماعت اسلامی دے لیڈر لیاقت بلوچ ایم این اے وی وَݙی اُچی شئے ہن ‘ کئی ویلھا ہا آپ ملتان دے ہک منڈوے تے فلماں دیاں ٹکٹاں بلیک اِچ وِچیندے ہن ویلھے ویلھے دی ڳالھ اے۔ فلمیں دی منادی آلیں نال ٹلی وَڄاوݨ آلا وزیر اے تے فلمیں دیاں ٹکٹاں بلیک کرݨ آلا ایم این اے ہے ‘ شیخ رشید آکھیا ! تُساں وزیراعظم کوں ڄیہاڑی تھاݨے ٹٻی آنگے منصورہ اِچ سݙ گھندے ہاوے ‘ اللہ ڄاݨے وزیر صَیب وزیر اعظم کوں کیا ڄاتا ہویا اے ‘ ٹٻی آلا تھاݨہ اَتے ٹٻی تھاݨے اِچ ڄیہاڑی حاضری ݙیوݨ دے پابند بندے تاں مشہور لوک اِن ‘ وزیر صَیب وزیر اعظم کوں اپݨی آنے آلی تھاں تے آن کھڑائے ‘ چنڳاں ‘ نِنھیں کیتا ‘ وَل ٹٻی تھاݨے تے جماعت اسلامی دے وݙے دفتر منصورہ کوں ہک مَٹ ڳݨینے‘ ٻیا قہر کیتے نے ‘ خیر سئیں! اسیݙا کیا انہیں دے اپݨے گھر دی ڳالھ اے ‘ لیاقت بلوچ آکھیا ! تُساں وَہابی ہیوے اَساں حنفی ہیسے ‘ ہکے واری ترائے طلاقاں ݙیندوں ‘ اہلحدیث ترائے واری آکھی ہوئی طلاق کوں ہِک ڳݨدِن ‘ شیخ رشید آکھیا اساں تسیکیوں بھڄݨ کائناں ݙیسوں ‘ اَدھ اِچ اپݨا بندہ پا ݙیسوں ۔ فیصل آباد دے گھنٹہ گھر تے وَل کٹھے آن تھیسوں ۔ پتہ نی شیخ رشید اَدھ اِچ اپݨا بندہ پاوَݨ دی ڳالھ کائنی کیتی ‘اے ݙوںکوں کٹھا کرݨ آلے اَدھلے بندے آلا کم تاں او آپ اِی چنگی رِیت کر ڄاݨدِن ‘ ایہ تے ایہو جیہاں ٻیاںڳالھیں پڑھ تے ملوم تھیندے جو مارکہ ہک ٻے دے آندری ٻاہری اِن ‘ اَتے سَو کوہ دا وَلا مَار تے ہک ٻے کوں ملین۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان