سوجھل دھرتی واس دے اگوانڑیں دی خدمت اچ صلاح

ضلع راجن پور دا مانڑ ہے جو ایندی عملداری اچ کوٹ مٹھنڑ ، مہرے والا تے "شہر کیفی "جام پور شامل ہے اے دھرتی علم و ادب دی دھرتی ہے ۔ اے ضلع صوفیا دا مسکن ہے ایں دھرتی تے خواجہ غلام فرید ۔ نارو والا سرکار، ابن_مولا علی حمزہ سلطان ، صحابی رسول سہل بن عدی تے انڑ گنڑتر مہان ہستئیں جوت جگائی اے ۔ ایں خطے علم و ادب کوں چراغ اعوانڑ، عاقل جوگی، کیفی جام پوری ، اسماعیل احمدانڑی جھئیں شاعر تے ادیب دان کیتن تے دور حاضر وچ اسلم رسول پوری، عاشق خان بزدار، صوفی تاج گوپانگ، ڈاکٹر شکیل پتافی، طارق اسماعیل احمدانڑی، حبیب اللہ طارق تے بئے ڈھیر سارے شاعر ادیب علم و ادب دی آبیاری اچ مصروف عمل ہن جیکر میں اتھاں سبھنائیں دے ناں گنڑاونڑ پئے ونجاں تاں پناں کھٹ ویسی۔ وابستگان_ادب سانگے اطیمنان دی گالھ ہے جو ایں دھرتی دے شاہر فاضل پور دے سجاک نینگریں "سوجھل دھرتی واس" دے ناں نال ہک ادبی تنظیم دا منڈھ بدھے تے ڈو ڈھائی سال دے تھوڑے جھئیں عرصے وچ آپڑیں نویکلی سنجانڑ بنڑائی ہے ۔ سوجھل دھرتی واس ہک ادبی تنظیم ہے تے ایندے نال نال وسیب دے حقوق دی بازیابی سانگے آپڑاں بھرواں حصہ رلیندی پئی ہے ۔ سوجھل دھرتی واس ایں مختصر عرصے وچ مہان شعراء نال شاماں مناونڑ تے کتابیں دی گھنڈ کھلائی دا آھر کیتے اتے سرائیکی تحریک دے یکے پارٹئیں کوں سڈ ہکے پلیٹ فارم تے کٹھا کرنڑ دا ترلا کیتے جیندے نال سوجھل دھرتی واس کوں اے اعزاز حاصل تھئے جو سوجھل دھرتی واس دی سڈی گئی اوں کانفرنس اچ سرائیکی لانگ ۔مارچ دا ہوکا ڈتا گئے۔ ضلع راجن پور اچ ارشد ادبی سنگت راجن پور، خواجہ فرید سرائیکی سنگت جام پور، دبستان فریدجام پور، بزم فیض جام پور، بزم خوشبو داجل، بزم کیفی جام پوری تے بیاں ادبی تنظیماں آپڑیں محدود وسائل دے اندر فروغ ادب سانگے کم کریندیاں پئین ۔ سوجھل دھرتی واس دی خوش نصیبی ہے جو ایندے سرپرست صوفی تاج خان گوپانگ ہن تے ایں تنظیم کوں اے تکڑ وی ہے جو ایندے اگوانڑ سر شاہ نواز مشوری، عثمان کریم بھٹہ تے منظور خان دریشک نویکلے سماجی حوالے دے حامل ہن ۔ ایں توں علاوہ ہروفیسر مرید عارف، جاوید آصف ، میثم سئیں تے ایں سویں بئے شاعر ادیب سوجھل دھرتی واس دے بانہہ بیلی ہن ۔ میں سوجھل دھرتی واس دی 17 مارچ کوں سرائیکی کانفرنس دے انعقاد دی مبارک باد پیش کرینداں تے ایں موقعے تے کجھ صلاح ثواب وی ڈیونڑ چہنداں ۔ 1۔ مشترکہ صلاح مشورے نال سبھ کنوں پہلے سوجھل دھرتی واس دا دستور مرتب کیتا ونجے۔ 2 ۔ سوجھل دھرتی واس دی باقاعدہ رکنیت سازی کیتی ونجے۔ 3 ۔ سوجھل دھرتی واس دا باقاعدہ ریکارڈ رکھیا ونجے تاں جو نال دے نال تاریخ مرتب تھیندی رہ ونجے تے آونڑ والے محققین کوں سوکھ تھیوے سرائیکی لوک سانجھ وسیب دی ہک معتبر تنظیم ہے لیکن افسوس اج دے محقق کوں ایندا ابتدائی دستور تے ریکارڈ میسر کائنی 4۔ موضوعاتی کانفرنساں دا اہتمام کر تے مقالہ جات لکھوائے ونجن تے ول او مقالہ جات کتابی شکل اچ شائع تھیون جیویں جو بزم ثقافت ملتان خواجہ فرید کانفرنس منعقد کر تے پریت مہار چھاپی ہئی تے اج وی تشنگان علم و ادب پریت مہار دی گول اچ راہندن 5۔ اعلی سطح دی "سوجھل دھرتی واس لائبریری" قائم کیتی ونجے جتھاں سکالرز ، طلباء تحقیق کرنڑ آلے ایں اطیمنان نال آ سگن جو اتھوں او خالی نہ ولسن یقین ہے اے لائبریری سوجھل دھرتی واس تے فاضل پور دا ناں اچا کرنڑ دا ذریعہ بنڑسی۔ (سلیم انسب )