سوبھا فقیر

فقیر سوبھا دا خاندان ریاست بہاول پور توں ہجرت کر تے سندھ وچ آباد ونڄ تھیا۔ آپ قوم دے لغاری بلوچ ہن۔ آپ دے والد سئیں دا ناں احمد ہئی۔ آپ دی ولادت وستی دائو والا ݙہرکی وچ تھئی۔ آپ دی صحیح ڄمݨیں دی تاریخ دا علم کینی۔ مگر تاریخ وفات کوں سامنیں رکھ تے ولادت دا سن 1235ھ قیاس کیتا ویندے۔ سوبھا فقیر چھوٹی عمر وچ قرآن پاک حفظ کر گھدا ہئی۔ گلستان بوستان تک فارسی پڑھی ہانیں۔ سوبھا فقیر ساری عمر شادی نہ کیتی۔ فقیر صاحب گوٹھ عالمانیاں وچ 90سال دے تھی تے 1325ھ وچ وصال فرمایا۔ آپ دا روضہ گوٹھ عالمانی میر پور ماتھیلو سندھ وچ ہے۔

سوبھا فقیر کافیاں ‘ ابیات ‘ نظم چوݙی صدی ‘ کنگن ‘ رٹھرا ‘ چھلا ‘ ہشت پاس ‘ مدح پیر خواجہ محکم الدین سیرانی ‘ قصہ لیلیٰ مجنوں تے قصہ جیون شاہ یادگار چھوڑین:

ݙوہڑہ

دلبر دے میں راہ اُتے ونڄ ونڄ وائیں ملساں ‘ مول نہ ولساں

ہر کائی ٹہکے ہوڑے پندھ تھلاں دے چلساں ‘ مول نہ ولساں

جے وت بخت ٹھرایا نال سڄݨ دے رلساں‘ مول نہ ولساں

آکھے سوبھا نال فضل دے سوہݨے کوں میں ملساں ‘ مول نہ ولساں

چھلا توں ونکی:

چھلا ہے امین دا ‘ صدقہ محمدؐ دین دا‘ بھرا ݙے یقین دا

سن میݙا سائیاں

دَر تیݙے سوالݨ آئیاں

چھلا ہے گجرات دا

صدقہ اپݨی ذات دا

سُݨ میݙے سائیاں

دَر تیݙے سوالݨ آئیاں

چھلا بہاول پور دا

صدقہ احمد نور دا سدا ہے حضور دا

سُݨ میݙے سائیاں

دَر تیݙے سوالݨ آئیاں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان