سنڄیاں سالھیں
سنڄیاں سالھیں
تھل دے ہاں وچ لڳیاں جھوکاں
ٻلدی ریت دے ٹٻیاں پچھوں
بھردیاں کندھاں اڄڑے کھولے
چھپر کاٹھ کٻاڑے توں
وچ ہک اندھے کھوہ دا ٹوٻہ
وقت دی ریت بھرے نت جیکوں
سامݨے کھڄیاں دا ہک جوڑا
تر تر ݙیکھے ایں سنج برکوں
ٻلدی ریت تے تنبوں تاݨن
ترسیاں فصلاں سڑدیاں جھوکاں
سکھ دا ساہ گھن کے مسکاون
تھل دے منہ دا کوڑ مریجے
ریت دی اکھ وچ پاݨی پووے
ول او گھپ اندھارے تھیندن
سڄے کھٻے اڳوں پچھوں
کجھ نی سجھدا تیڈے توں
دور کہیں نگری توں تیݙیاں
ہکلاں دیاں آوازاں آندن
اوہ آوازاں ݙیویاں وانگوں
میݙے چار چوقیروں بھوندن
میں اے آتشبازیاں چاکے
اندھے کھوہ وچ لہندا وینداں