سندھ دے پیر
اسیݙی وستی ءِچ سندھ ءِچوں پیرگھوڑیں تے اَمدے ہَن ، گھوڑیں دے وستی آلے اڳوں تے ونڄ تے استقبال کریندے ہن ، پھلیں دے تے نوٹیں دے ہار پویندے ہن تے ہتھ چُم تے اَکھیں کوں لیندے ہن ۔ آگتمولودی مولود پڑھدے ہن ۔ کجھ سہرے وی اَکھیندے ہن ’’چٹا پُھل غلاب دا موجل سئیں دے باغ دا‘‘ پیر ہفتہ ہفتہ ، ݙو ݙو ہفتے رہندے ہن ۔ نویں کھٹ ، ٹکریلیاں گندیاں ، نویں کھیس ، سیالا ہووے ہا تاں نویاں سوڑیں ہوندیاں ہن ، تھاں تھپہ وی صندوقیں ءِچوں نواں کڈھیا ویندا ہا ۔خلیفے نال ہوندے ہن ، ہنائیں دی وی داری تھیندی ہئی۔ مرید تے خلیفے تلے تے پیر اُتے ٻہندا ہا ، تلے ٻہݨ سانگے پڑچھ وچھائے ویندے ہن ، پڑچھ نویں ہوندے ہن تے رنگیل بھوتریں دے بݨائے ویندے ہن ، پیر آوے ہا تاں وستی ءِچ ککڑیں دے کرکاٹ ہوندے ہن،پکڑائی نہ ݙیندیاں ہن ، پکرݨ کیتے ککڑیں دے پچھوں بھڄدے ہاسے تے او کر کر کریندیاں ہن ۔ پیر سئیں اسیݙی وستی دے سردار ڄام خان دھریجہ دے دیرے تے اَمدے ہن ۔ لیلے وی کوہیندے ہن ، جیرھے پیر اساں اَمدے ݙٹھے اُنہاں ءِچ موج علی شاہ ، عثمان شاہ ، الطاف شاہ ، ظفر شاہ تے علی حیدر شاہ ، انہاں ء ِچوں علی حیدر شاہ ساوی پیندے ہن تے مٹیے ہوئے آدمی ہن ۔ عثمان شاہ آکھدے ہن دھریجیں نال پیری مریدی دے نال نال رشتے داری وی ہے ۔ ساری وستی ہنائیں دی منڈھ قدیم توں مرید ہئی ، صرف میݙے نانا سئیں دین پور شریف آلئیں دے مرید ہن ۔ ہک واری نانا سئیں گھوڑی تے میکوں وی ٻلہائی ڳے ۔ دین پور شریفء ِچ پیر سئیں تلے ٻیٹھا ہا تے مرید وی تلے ٻیٹھے ہن ،میݙی اتنی زیادہ عمراں تاں نہ ہئی پر میکوں پیر سئیں دا مریدیں نال تلے ٻہݨ چنڳا لڳا۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان