سمّی

غلام حسن حیدرانی سمی راول دی لوک داستان کوں وݙے چسولے ا نداز اِچ منظوم کیتے۔ ایں موضوع تے اے پہلی مثنوی ہے جیڑھی سرائیکی زبان وچ لکھی ڳئی ہے۔ ایں توں علاوہ سرائیکی زبان دے شعری ادب دی اے چھیکڑی مثنوی ہے جیڑھی جدید شاعری دے اَڄوکے دور اِچ جون 1972ء وچ شائع تھئی اے۔ حیدراݨی دی ایں مثنوی اِچ زبان و بیان دیاں ساریاں خوبیاں تے فنی وݙائیاں وݙی سج دھڄ نال موجود ہن۔ نمونہ کلام:

سمی راول دی تانگھ وچ بے قرار ہے۔

پیئو ماویر دے نال گزارے سمی تھی بے غمی

شاید رُل پِھل آوے راول آس رکھیندی سمی

گزریا سال کریندی رہ ڳئی انتظار نکمی

کالی رات وچھوڑے والی پر نہ اصلوں دھمی

آکھ حسن رو آکھے سمی کان ݙکھاں ہَم ڄمی

سمی دے گیت وݙے ذوق شوق نال ڳائے ویندن۔ سمی تونسے دے ہک موچی دی دھی ہئی۔ جَیں براہوی بلوچ راول نال عشق کیتا ہئی ۔ اے ہک سچی داستان ہے غلام حسن حیدراݨی سمی دا منظوم قصہ وی لکھیا ہے ۔ سمی نال منسوب گیت ہک باقاعدہ صنف دی صورت اختیار کر ڳن۔ کجھ محققین سمی دی صنف کوں شمس راݨی تے ڈھول بادشاہ دے نال منسوب کریندن جو درست کینی ۔ سمی خود وی شاعرہ ہئی ۔ اوندے اپݨے لکھے ہوئے ڈھیر سارے گیت وی ہُݨ تئیں لبھ گھدے ڳن۔ سمی دا ہک گیت:

بھلا جھوکاں والڑے دا بھلا میݙے ماہی دا

آ سمی آپاں تھل ڄلوں تھل دے ٻاڑے کھو

آجڑ والے آجڑی مال لتاڑی جو

بھلا جھوکاں والڑے دا بھلا میݙے ماہی دا

چھڑیاں لوکو منجھیں ڳائیں سِنگ جنھاں دے کُنڈھے

جھربے کھیر دے بھر بھر ݙیون کھا جوار دے سُنڈھے

بھلا جھوکاں والڑے دا بھلا میݙے ماہی دا

ڳائیں بھورل ماہی والیاں چھڑ کے ٻیلے رلیاں

پُچھ جنھاں دے پٹ دے ٻوݙے تھن سونے دیاں نلیاں

بھلا جھوکاں والڑے دا بھلا میݙے ماہی دا

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان