سلیم خان عباسی دی مکاݨ

محمد سلیم خان عباسی ( بھشتی ) جیئیں ساہ گھدے اوں ساہ ڈیونڑاں وی ھے ؛ دنیا جھوک فنا دی اے ؛ اوڑک جھوک لڈانونڑیں پوندی اے ؛ جیھڑے ھاں دے ٹوٹے ھوندن انھائیں کوں چھوڑ تے ونجنڑاں پوندے ؛ اپنڑے جھوک لڈیندن تاں ھاں پھٹ ویندے ؛ رو کوں مونجھاں ولھیٹ ویندین ؛ اکھیں سکدین ڈیکھنڑ کیتے ونجنڑ آلے کتھ ولدن محمد سلیم خان عباسی بھشتی اپنڑیاں کوں کلھا کر تے ٹر گئے ؛ کڈھائیں ناں کاوڑ کرنڑ آلا ایجھا رسئیے جو ول نسی ولنڑاں ؛ منیجنڑ تاں پرے ریھہ گیا ؛ رسدا تاں او ھا ای کیناں ھتھوں رسیاں کوں منیندا ھا ودا مکدے ساہ تونڑیں کھلدا ریھا تے کھلویندا ریھا ؛ بھاول وکٹوریہ ھسپتال بھاول پور دے دل دے وارڈ اچ ڈاکدار نرساں مریض تے آنونڑ ونجنڑ آلیاں کوں گال گال تے کھلویندا ھا ؛ اوندیاں گالھیں بماراں آلیاں تاں ھن کیناں ؛ اے تاں لگدا ای ناں ھا جو سلیم عباسی کوں دل دا روگ اے تے روگ وی او جیھڑا اوکوں مکائی کھڑا ھا ؛ اے تاں اوندے ایمان دی تکڑائی ھئی جو مکدے ساہ تائیں لگدا ایویں ھا جو اوکوں کجھ کینی ؛ بھاء لگے ایں دل کوں ؛ ایجھا گلیا جو اپنڑی جاہ تے ناں آیا ؛ محمد سلیم خان عباسی بھشتی دے خاب اوندی اکھیں اچ ریھہ گئے تے او پچھلے ھفتے سب کوں روندا چھوڑ تے جھوک لڈا گیا ( اللہ سوھنڑاں اوندے درجات ودھاوے اوندی بخشش کرے آمین ) سانول عباسی تے منا بھائی روندن جو او اپنڑے بابے کوں ونجا کھڑن ؛ او تاں اپنڑی اکھیں اچ خاب سجائی کھڑے ھن اپنڑے بابے کیتے ؛ ڈونھیں بھرا ھاں کوں لائی ودن

سانول ؛ منا بھائی میڈے پترو دنیا امتحان دی جاہ ھے تساں ھمت کرو تساں اپنڑی ماء تے بھینڑاں کیتے حوصلہ کرنڑیں ؛ تھاڈے بابے دا ھک خاب ھا جو اوندی اولاد ساوی سوکھی ھووے اوندے خاب کوں تساں پورا کرنڑیں تاں جو اوندی روح کوں سکون ملے اللہ سوھنڑاں تساں ساریاں کوں اپنڑی امان اچ رکھے آمین. اج کھوھیاں ( یونین کونسل محراب والا ) بالاں بچیاں سودھا محمد سلیم خان عباسی بھشتی دے گھر ونج تے اوندا ارمان کیتم. 30 دسمبر 2018 (سلیم خان نیازی)