سلطان محمد انصاری

1100ھ. مخدوم رشید ملتان دے نیڑے چک 116وچ ہک انصاری خاندان آباد ہے جیندے سارے وݙ وݙیرے عالمِ دین تے سرائیکی زبان دے شاعر ہن۔ انھاں بزرگاں دی یادگار ہک شاندار لائبریری وی ایں چک اِچ موجود ہے۔ جیندے وچ سینکڑاں قلمی کتاباں موجود ہن۔ انصاری خاندان دے بزرگان دینی مسائل سیرت پاک تے کافی منظوم کتاباں یادگار چھوڑین۔ انھاں بزرگاں وچوں مولوی سلطان محمد انصاری 1100ھ وچ شرح نبیؐ۔9صفحات تے قصہء ثانی مکتوب 12صفحات تے تحریر کیتے۔ اے قلمی نسخے انتہائی بوسیدہ حالت وچ ہن۔ شرح نبیؐ وچوں نمونہ کلام:

یا رسول اللہ کر یاری

صلی اللہ تیکوں لکھ واری

لکھ درود بھیڄاں ہر واری

تیݙے ذکر دی ہے سرداری

الف آکھاں میں حمد خدا

مالک ملک سچے بادشاہ دا

بھیڄیُس سوہاں ہر راہ واہ دا

کارݨ  اُمت اوڳݨ ہاری

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان