سلطان عمر علی سیف الدین مسجد

سلطان عمر علی سیف الدین مسجد برونائی سلطنت دے دارالحکومت بندری سری بیگوان وچ موجود ہک شاہی مسجد ہے۔ اے مسجد ایشیا بحرالکاہل دے خطے دیاں خوبصورت ترین مسجداں وچوں ہک ہے تے ملک دے مشہور سیاحتی مقامات وچوں وی ہک ہے۔ اے مسجد برونائی دی پہچاݨ سمجھی ویندی ہے۔

اے مسجد برونائی دے اٹھاویہویں سلطان دے ناں نال منسوب ہے۔ ایندی تعمیر 1958ء وچ مکمل تھئی ہئی تے اے جدید اسلامی طرزِ تعمیر دا ہک شاندار نمونہ سمجھی ویندی ہے جیندے تے اسلامی تے اطالوی طرزِ تعمیر دی گہری چھاپ ہے۔ اے مسجد دریائے برونائی دے کنارے ہک مصنوعی تالاب تے بݨائی ڳئی ہے۔ مسجد سنگِ مرمر دے میناراں، سنہری گنبداں، صحناں تے ہرے بھرے باغات تے مشتمل ہے۔

مسجد دے مرکزی گنبد تے خالص سونے دا کم کیتا ڳیا ہے۔ مسجد 52 میٹر دی بلندی تے واقع ہے تے بندری سری بیگوان شہر دے کہیں وی حصے توں آسانی نال ݙٹھی ون٘ڄ سڳدی ہے۔ میناراں وچ جدید برقی پوڑیاں لڳیاں ہوئیاں ہِن جیڑھیاں اتے ون٘ڄݨ دے کم آندیاں ہِن۔ مسجد دے میناریں توں شہر دا ہوائی نظارہ قابلِ دید ہے۔