سقوط منکیرہ

سقوط منکیرہ۔۔۔

25 دسمبر 1821

پندرھویں صدی وچ جتھاں ریاست ملتان اپݨے شمال مغربی تجارتی رستاں کوں محفوظ بݨایا اتھائیں سیت پور تو کوٹ کروڑ تے دھن کوٹ کالاباغ تک دفاعی بندوبست وی بݨایا گیا۔ سندھ دی ݙلہائی مݨ تے وسے دیرہ جات کوں تھل دے ݙنبہاری تے ملتان دے اوبھے ݙنبہاری دفاعی مرکز شورکوٹ نال ملاوݨ کیتے تھل دے درمیان قلعہ منکیرہ وی بݨیا۔

جیندی دھوڑ تے چرچے سولہویں صدی ئچ ٹھٹھہ تے مکران تئیں پہنچے۔

ول ایں دھرتی کوں نظر لگی تے نحوست اتھاں اپݨاں گھر گھتا۔ ابھے دیرہ دے ہوت تے لمے دیرہ دے میرانی چوتا مار آپت ئچ جپ گئے۔ بھاجڑ تے بانہیں کپوا کے چھیکڑ گانمن سچار دی من کے بس کتونیں۔

تے 1739 وچ نادر شاہ دہلی دی فتح توں بعد دیرہ اسماعیل خان دے رستے ایں دھرتی کوں سنج کرݨ آ گیا ۔

افشار مویا تاں ول آؤندے لٹیرے جرنیل ابدال بݨ کے ایں علاقے کوں لتاڑݨ لگ پئے۔

تے دیرہ جات دی گورنری والی کابل دے ہتھوں ملݨ پئے گئی۔ جیڑھا گورنر بݨے اوھو عوام کوں لگان، مالیہ تے ٹیکس دے بہانے پنج کے رکھ ݙیوے۔

کابل دی بھگوانی توں بعد اے گورنر رنجیت سنگھ دے باجگزار ب ݨے تے عوام کوں لٹ کے ساری مݙی سکھاں کوں ݙتونے۔

انہاں ݙیہاں وچ اے لوک اکھاݨ ہر کئیں دی زبان تے ہا۔

"چٹی پئی مہراں تے

مہراں پائی شہراں تے"

(جرمانہ تاں سرداراں تے پیا پر سرداراں نے عوام کنوں وصول کیتا).

25 دسمبر 1821 کوں ٹھیک اج دے ݙینہہ منکیرہ دے نواب احمد خان سدوزئی منکیرہ دا سقوط لکھ کے ݙتا تے بدلے وچ دیرہ اسماعیل خان دی جاگیر تے راضی تھی کھڑا۔

حیدر خان، دولہا دریا خان تے داؤد خان جئیں دلیری دکھاوݨاں صرف انہاں دا کم اے جیڑھے کئیں دے کراوے بݨݨ دی بجائے دھرتی تے قربان تھیندن۔

25 دسمبر 1821 سقوط منکیرہ دے نانویں

اقتباس۔۔۔

حوالے

1. تاریخ ریاست منکیرہ

2. تاریخ لیہ

3۔ تاریخ بھکر

4. ݙسٹرکٹ گزئٹئر دیرہ اسماعیل خان — thinking about ‎سقوط منکیرہ‎.