سفیرؔ لاشاری
اصل ناں محمد رمضان
قلمی ناں سفیرؔ لاشاری
جٖمنْ 1925ء
جاہ پتہ محراب والا تحصیل احمد پور شرقیہ ضلع بہاولپور
سفیرؔ سئیں سابقہ ریاست بہاولپور دی معروف ادبی شخصیت ہن۔ جیڑھے نصف صدی توں شاعری کریندے پَین۔آپ ہک محب وطن سچے تے کھرے شاعر ہن۔آپ اپنْی مزاحمتی شاعری دے حوالے نال پورے سرائیکی وسیب اچ نشابر ہن۔آپ دے کجھ غزلیہ اشعار ڈٖیکھو!
غزل
[لکھو | ماخذ وچ تبدیلی کرو]نہیں شکوہ زمانہ بے وفا ہے
شناسا یار جو نا آشنا ہے
میڈٖی وستی دے وچ ونجٖو تاں کہیں توں
میڈٖے اُجٖڑنْ دا قصہ وی سنْاہے
سمندر لُک گٖئے ہن دھوڑ دیوچ
خدا جٖانْے جو اے کیا ماجرا ہے؟
زمانے نال ٹردا ہم تاں پُجٖ گٖیاں
میڈٖی منزل دے راہی کوں اکھاہے
سفیراؔ آکھ ڈٖیؤ دل والیاں کوں
جے ہمت ہے تاں میکوں آ مِلاہے
؎تھی گٖئے محفل دیوچ مدہوش دیوانے بٖہوں
بھر ڈٖتے ساقی نے اکھ دے نال پیمانے بٖہوں
رو پِیم تاں خوش تھیا ساریاں خطائیں بھُل گٖیاں
توڑے بھڑکایا ہا اوکوں میڈٖے اعدانے بٖہوں
باغ باں بنْ کے سفیراؔ آپ تاں گٖلچیں نہ بنْ
ایہ چمن مہکیاں ہے گھن تے رت دے نذرانے بٖہوں
؎کچا کوٹھا ہے میں بارش دی دعا کیویں کراں
رڑھ وی سکدی پئی ہے توں میکوں ڈٖسا کیویں کراں
ہے نیانْی سروں رانْی آپ وی بیمار ہاں
سر کجٖاں اوندا ، گھناں اپنْی دوا کیویں کراں
؎اجٖ تاں اوں بے وفا دی گٖالھ کروں
ہُنْ کہیں بٖئے خدا دی گٖالھ کروں
او تاں شہکار ہے قدرت دا
کیڑھی کیڑھی ادا دی گٖالھ کروں
٭٭٭