سعید راشدؔ

1943ء  تا  2015ء

سعید راشد 14جون 1943ء کوں مولوی قادر بخش دے گھر کوٹ مبارک ضلع ڈیرہ غازی خان اچ پیدا تھئے۔تعلیم ایف ایس سی دے بعد پٹوار دا کورس مکمل کیتا ۔مگر پٹوار گیری توں انہاں کوں انہاندے والد بزرگوار منع کر ڈتا ،تے ول انہاں کار پوریشن اچ ملازمت اختیار کر کے اپنی عملی زندگی دا آغاز کیتا۔جتھوں تک آپ دی شاعری دا تعلق ہے تاں 1960ء کنوں انہاں شاعری شروع کیتی ،جڈاں جو ’’انگل‘‘ دے ناں نال آپ دا ہک شعری مجموعہ چھپ چُکے۔سعید احمد راشد دا شمار ڈیرہ غازیخان دے استاد شعراء وچ تھیندا ہا،آپ سرائیکی شاعری دیاں تمام مروّجہ اصناف اچ شاعری کریندے ہن ،آخر 23رمضان المبارک 1915ء کوں آپ ایں دار فانی توں رحلت کر گئے۔

غزل

بالاں  وانگوں یارا! ٹُرن سکھدے پئے ہیں

تیڈا  گھن سہار ا  ٹُرن سکھدے پئے ہیں

ٹُریئے ہاسے پہلے بنبوٹے  ڈتے ہن

ولا  ول  دوبارا ٹُرن سکھدے پئے ہیں

مخالف  ہوائیں وی چا   چا  بھُکیسن

پتہ رکھ کے سارا ٹُرن سکھدے پئے ہیں

جتھاں سجھ اُبھردے نماشاں ہے تھیندی

سمجھ اے اشارا ٹُرن سکھدے پئے ہیں

اے کھیڈیں دی بھیڑے توڑے سارے پِڑ تے

ڈُکھا گھن کے وارا ٹُرن سکھدے پئے ہیں

متاں ایں  بہانے  او راشدؔ  منیجے

ایہو کر کے چارا ٹُرن سکھدے پئے ہیں

٭٭٭