سسّی پنوں

بھنبھور دے راجے آدم جام دے گھر سسی پیدا تھئی تاں رملیاں راجے کوں ݙسیا کہ اے لڑکی وݙی تھی تے ہک مسلمان نینگر نال عشق تے شادی کریسے او اُلخاں ملخاں اِچ ایندی شہرت پُڄسے۔ راجے بدنامی دے ݙر توں ہک صندوق اِچ زرجواہر سمیت سڄل ڄائی دھی کوں بند کر تے دریائے سندھ وچ لوڑھ چھوڑیا۔ اے صندوق آتا دھوبی دے ہتھ لڳا۔ اوندی کوئی اولاد نہ ہئی۔ اوں سسّی کوں وݙی سِک نال پالیا۔ سسی جوان تھئی تاں اوندے حسن دا چرچا چوڳوٹھ ہُلیا۔ سسّی دادریا دے پتݨ تے ہک شاندار باغ ہئی۔ مکران دے بلوچ سوداگراں دا قافلہ پتݨ پُڄا تاں سسی انھاں کوں گرفتار کرا گھدا۔ قافلے دا سردار پُنل خان کیچ توں اپݨا مال اسباب چھڑاوݨ آیا تاں سسّی تے پنوں ہک ٻئے دے عشق وچ گرفتار تھی ڳے۔ پنوں سسی نال شادی کر گھدی مگر پنوں دے پیئو عالی خان کوں اے ڳالھ پسند نہ آئی اوں اپݨے بندے بھیجئے تے او پنوں کوں نشہ پلا تے بے ہوشی دی حالت اِچ کیچ چا ڳئے۔ سسّی ݙوجھے ݙینہ کلہی پنوں دی ڳول اِچ تھل دے سفراں تے راہی تھی ڳئی تے روندی رڑدی بھڄدی دُھرکدی صحرا وچ مر کھپ ڳئی۔ اُݙے پنوں کوں ہوش آیا تاں او وی سسّی دی ڳول وچ پچھوں تے بھناں تے آخر سسّی دی قبرتے آ تے جان ݙے ݙتس۔ ایں طرح ݙوہیں وچھڑئیے روح ہک ݙوجھے نال مل ڳئے۔ سسّی پنوں دی کہاݨی وچ تھوڑا ٻہوں واقعاتی اختلاف پایا ویندے۔ سرائیکی شعراء اینکوں بھٹہ واہݨ دے راجے دی لڑکی منیندن جیڑھی اِتھوں لُڑھ تے بھنبھور دے دھوبی دے ہتھ آئی۔ تحصیل صادق آباد دے تاریخی قصبے بھٹہ واہن اِچ اَڄاں تئیں ݙوں منزلہ سسّی دی ماڑی موجود ہے۔ اتے اُوں گھیر تے اَڄ وی ملنگ دیرے لائی بیٹھن۔ جتھوں سسّی کوں دریا بُرد کیتا ڳیا ہئی۔ سرائیکی زبان وچ سسّی پنوں دے قصے دی روح خالص رومانی اندازاِچ ملدی ہے مگر تصوف دے زیر اثر اکثر شعراء اینکوں تمثیلی انداز وچ وی بیان کیتے۔ پنل محبوب حقیقی تے سسی ہک سچے عاشق دی طرح اوندی ڳول اِچ سرگردان ݙسدی ہے۔ سسی پنوں کوں عشق و محبت تے حقیقت و معرفت ݙوہاں رنگاں وچ رَج رَج تے پیش کیتا ڳے۔ کافیاں ‘ ݙوہڑے ‘ سی حرفیاں تے نعتیہ شاعری وچ ایں عشقیہ داستان دا ٻہوں ذکر آئے۔ اے ہک المیہ داستان ہے جیڑھی مذہبی تے سماجی قدراں دی ڄموڑ ہے سسی دا پیئو صرف ہیں سانگے اونکوں دریا دے حوالے کریندے کہ او کہیں مسلمان نال شادی نہ کر گھنے تے پنوں دا پیئو وی اے گورا نہیں کر سڳدا جو کیچ دے سردار دا پُتر ہک دھوبی دی دھی نال پرنیجے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان