سرور قریشی۔
ج:1925ء ، م:7 مئی 2008ء
سرور قریشی دے ابا سئیں دا ناں مولوی عبد الکریم ہا۔ جیڑھے جو خطیب ہن۔ سرور قریشی سئیں 1925ء اچ کلانج آلے دی وستی اچ پیدا تھئے ۔سرور قریشی دے ابا سئیں بعد اچ احمد پور شرقیہ لݙ آئے۔ قریشی سیں احمد پور وںاٹھ جماعتاں پاس کیتیاں تے ول ’’برٹش آرمی ‘‘ دی سول ٹرانسپورٹ اچ ملازم تھی ڳئے پاکستان بݨݨ ویلے قریشی سئیں فیروز پور انڈیا اچ موجود ہن۔ تقسیم دے بعد کراچی چلے ڳئے تے محنت مزدوری کیتی۔ ول احمد پور شرقیہ آ ڳئے تے اتھاں عطر فروشی شروع کیتی۔ قریشی سئیں سادہ مزاج تے من بھانوݨے بزرگ ہن ادبی فورم چلاوݨ تے یاراں دی خدمت کرݨ انہاں دا کمال ہا۔جݙاں مشاعرہ ہوندا سبھ توں پہلے پڄ ویندے ۔ قریشی صاحب پووݨ سٹ غزل لکھی۔ بعد اچ نعت لکھݨ لڳ گئے۔ انہاں دیاں نعتاں دا مجموعہ ’’تن روشنی من روشنی ‘‘ دے ناں نال 2006ء اچ چھپیا۔ آپ ۷ مئی ۲۰۱۰ء اچ ایں فانی جگ توں جھوک لݙا ڳئے۔ سرور سئیں دی غزل سادہ مرادی ہوندی ہئی سرور سئیں دی سادگی دوستاں نال خلوص تے سِک دا رشتہ مرݨ دے بعد وی قائم اے ۔
روز دیاں سرور کِریراں، کاوڑاں اَݨ بݨ مِٹھا
چھوڑ بھَڑیاں عادتاں سوہݨے نبھا دی گاٖلھ کر
ٔٔ٭ بمطابق کتبہ قبر گُستان عظمت سلطان احمد پور شرقیہ۔ یکم مارچ2012ء
کلام ٭
(1)
ایہ کہانی ول سݨا ول دِلرُبا دی گاٖلھ کر
اُوندے ڳݨ تے اُوندے نازو اَدا دی گاٖلھ کر
رسمِ الفت تھئی تاں ہن ، ݙینہہ پیاردے گُزرے کیویں
ٻئی کہانی چھوڑ توں ، اُوندی وفا دی گاٖلھ کر
رات ݙینہہ ݙیندا کھڑے ہک در اُتے وَل وَل سدا
جیڑھا ٻئے دَر تے نی ویندا، اُوں گدا دی گاٖلھ کر
اُوندیاں زُلفاں ، لب اتے چہرے دی وکھری ڳالھ ہے
ہے سبھ توں ودھ لڳدی جیہڑی اُوندی ادا دی گاٖلھ کر
کیویں سوہݨی راند ہئی ، باہم محبت پیار دی
کیوں خفا تھئیں یار کوئی میڈی خطا دی گاٖلھ کر
روز دیاں سرور کَرِیراں کاوڑاں اݨ بݨ مِٹھا
چھوڑ بَھڑیاں عادتاں ، سوہݨے نبھا دی گاٖلھ کر
(2)
ہوٹھ رَتے کر نہ اپݨے ہتھ نہ کر پیلے ٻہوں
آسوں پاسوں تیݙے راہندن لوک دردیلے ٻہوں
لفظیں وانگوں نقش تیݙے چہرے دے پڑھدا رہیاں
میݙے دل کوں بھا ڳے تیݙے نین شرمیلے ٻہوں
پیار دیاں رُتیں ولیندی ہے تیݙے رُخ دی بہار
پر تیݙیاں نظراں دے لڳدن تیر زہریلے ٻہوں
جھاتی اندر پائوں تاں سارا کُوہڑ ساری کالوِݨ
ظاہری ݙیکھوں تاں لڳدن چہرے چمکیلے ٻہوں
میں کِتھاں سوچاں کِتھاں اکھیں کتھاں نندراں کِتھاں
کیتے میکوں ہک وچھوڑے نے ویہر ویلے ٻہوں
اَڄ دی زہریلی ہوا دا تھیندا پئے ایجھا اثر
ساوے ساوے باغ تھیندے ویندے ہن پیلے ٻہوں
توں کھڑا رستے تے سرور پیر ڳݨدا رہ ڳیوں
منزلاں تے پُڄ ڳئے تیݙے یار پھُرتیلے ٻہوں
٭ کلام اُنھاں دے پُتر ݙتاجیڑھا ہِک کاغذ تے موجود ہا۔2جنوری 2012ء
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان