سرور خان سرور

1932ء تا 1997ء

سرور خان سرور ؔ مرحوم دا تعلق ضلع ڈیرہ اسماعیل خان دے سکھاݨی قبیلے نال ہا، آپ تحصیل پروآ دے رہوݨ والے ہن ، زمیندارہ کریندے ہن۔جتھوں تک آپ دی شاعری دا تعلق ہے تاں ݙوجھیاں صنفاں دے نال نال غزل وی خوبصورت لکھدے ہن۔ نمونہ کلام حاضر ہے

غزل

امیداں دے ݙیوے بٖیٹھاں راہ تے بٖالی

ہجر دی پئی سر تے ݙسے رات کالی

زمانے تے سوہݨیاں دی کئی تھوڑ کائنی

میݙے دلربا دی ہے صورت نرالی

ہے مسکار دلبر دی من ٹھار ݙیندی

مسرّت ݙکھیندی ہے شفقت دی لالی

نظر دا اثر ہے یا کئی جادو گر ہے

پتہ نئیں جو کیویں بݨیندے موالی

اے ہک ول تاں نئیں ہن ہزاراں ولاکے

کھڑی دل پھسیندی ہے زلفاں دی ڄالی

سنجیدہ سخن ہے تے شیریں کلام اے

ایندی ہر ادا ہے ادا بے مثالی

میں مجنوں دے وانگے اُتھاں ونڄ کے بٖہنداں

جتھاں یار سرورؔ کوں ݙیندے ݙکھالی