سردار کوڑے خان جتوئی
سردار کوڑے خان جتوئی سرائیکی وسیب کیتے ہک بکھدے سجھ دی کار ہن۔ آپ ضلع مظفر ڳڑھ شہر جتوئی وچ 1800ء دے لڳ بھگ پیدا تھے۔ آپ دے والد دا ناں سردار خان جتوئی ہئی۔ سردار کوڑے خان جتوئی ہک عظیم علم دوست انسان ہن۔ آپ ہمیشہ درس و تدریس کیتے دل کھول تے عطیات ݙتے۔ علی ڳڑھ ‘ حمایت الاسلام لاہور تے انجمن نصرت الاسلام ملتان جہیں تعلیمی اداریاں کوں آپ ہمیشہ مالی اعانت کیتی۔ سردار کوڑے خان جتوئی اپݨے علاقے وچ انگریزی طرز دے سکول کھلوائے تاکہ اوں پسماندہ علاقے وچ تعلیم دا وادھا تھیوے۔ وفات توں پہلے آپ اپݨی زرعی جائیداد دا تریجھا حصہ پندرہ ہزار ایکڑ رقبہ اپݨے علاقے دے نوجواناں دی تعلیم واسطے وقف کر ݙتا۔ میر حسان الحیدری آہدن ’’مظفر ڳڑھ دا اے نامور فرزند بلامبالغہ سرائیکی علاقے دا سر سید تے حاجی شریف اللہ اکھواون دا حقدار اے۔(73)سردار کوڑے خان کوں حضرت خواجہ غلام فریدؒ نال بے حد عقیدت ہئی۔ سردار صاحب دی وفات 1898ء وچ تھئی۔ مزار تے ایہو تاریخ درج ہے۔(74) سردار کوڑے خان سرائیکی زبان وچ شاعری کریندے ہن۔
تیں ٻاجھوں دل سنگ یارا
ہیوں اَڄ کل ݙاڈھے تنگ یارا
کوڑے خان ! سٹ فخر وݙائی
بن دونھیں دار ملنگ یارا
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان