سردار کوڑا خان جتوئی

نواب سردار کوڑا خان جتوئی، جنہاں دا تعلق موجودہ مظفر گڑھ نال ہئی، میر بجار خان دی اولاد وچوں ہن۔ میر بجار خان نے 1555ء وچ ہندوستان فتح کر کے نصیرالدین محمد ہمایوں کوں واپس ݙتا ہئی۔ ہمایوں نے میر بجار خان کوں دہلی، پنجاب، ساہیوال، جھنگ، ملتان تے نخلستان تے میرواہ دی ملکیت ݙتی۔

میر بجار خان نے ملتان، نخلستان تے میرواہ دا علاقہ اپݨے کول رکھیا تے باقی علاقہ میر چاکر خان دی مشاورت نال ٻئے بلوچ قبیلے وچ تقسیم کر ݙتا۔ میر بجار خان نے اپݨے وݙے پتر میر نوتک خان کوں ملتان وچ آباد کیتا۔ میر نوتک خان نے اپݨے وݙے پتر میر لوہار خان کوں سردار مقرر کیتا۔

تقریباً 200 سال پہلے انگریزاں نے جتوئی قبیلے نال دوستی کرݨ دی خواہش ظاہر کیتی تے جاگیر ݙیوݨ دی پیشکش کیتی، مگر اوں ویلے دے سردار میر بلوچ خان نے پیشکش ٹھکرا ݙتی۔ بعد وچ میر بلوچ خان نے اپݨے بھڑینجے کوڑے خان کوں سردار مقرر کر ݙتا تے اپݨے بھتریجے میر مزار خان کوں سپہ سالار مقرر کیتا۔

انگریزاں نے کوڑے خان کوں مجسٹریٹی ݙتی تے مظفر گڑھ کوں ضلع بݨا ݙتا۔ میر بلوچ خان نے ضلع دے انتظام کیتے لیہ تے مظفر گڑھ وچ ہک لکھ کنال رقبہ ݙتا۔

کوڑے خان نے اپݨی آمدنی نال سرکاری عمارتاں، سرائے، سڑکاں تے مساجد بݨوائیاں تے چناب تے لوہے دا پل بݨوایا۔

اپݨی زندگی دے آخری ایام وچ اِنہاں نے اپݨی جائداد دا ہک تہائی حصہ رفاہ عامہ کیتے وقف کر ݙتا۔ کوڑے خان دی کوئی اولاد نہ ہئی، اِیں کیتے اِنہاں دی جائداد دا انتظام سردار کوڑے خان لینڈ پراپرٹی ٹرسٹ کریندا ہے۔

انگریزاں نے اِنہاں کوں نواب تے محسن مظفر گڑھ دے القاب ݙتے ہن۔