سردار سلیم حیدر خان

سردار سلیم حیدر خان ہِک پاکستانی سیاستدان ہِن جِیڑھے اِیں ویلھے پنجاب دے گورنر دے طور تے کم کریندے پئے ہِن، اَتے انہاں 10 مئی 2024 کوں عہدہ سنبھالیا ہِے۔ سردار سلیم حیدر خان 1970 وچ ضلع اٹک دی تحصیل فتح جن٘گ وچ ڄمے۔ سردار سلیم حیدر خان وزیراعظم شہباز شریف دی کابینہ وچ وفاقی وزیر اعظم دے معاون خصوصی برائے اوورسیز پاکستانیز اَتے انسانی وسائل دی ترقی دے طور تے، 2008 توں 2011 تئیں وزیر مملکت برائے دفاعی پیداوار، اَتے 2012 توں 2013 تئیں وزیر مملکت برائے دفاع دے طور تے وی کم کیتا ہِے۔ اِیں توں علاوہ، او 2008 توں 2013 تئیں پاکستان دی قومی اسمبلی دے رکن وی رہے ہِن اَتے پاکستان پیپلز پارٹی دے رکن ہِن۔

سیاسی پن٘دھ

سردار سلیم حیدر خان 2002 دے عام انتخابات وچ پاکستان پیپلز پارٹی دے امیدوار دے طور تے صوبائی اسمبلی پن٘جاب دے حلقہ پی پی-18 توں الیکشن لڑیا ہا، پر کامیاب نہ تھی سڳے ہن۔ او 2008 دے عام انتخابات وچ پیپلز پارٹی دے امیدوار دے طور تے حلقہ این اے-59 توں قومی اسمبلی دے رکن منتخب تھئے ہَن۔ انہاں 71,400 ووٹ حاصل کیتے اَتے پاکستان مسلم لیگ ق دے امیدوار وسیم گلزار کوں ہَرایا ہا ۔ نومبر 2008 وچ، انہاں کوں وزیراعظم یوسف رضا گیلانی دی وفاقی کابینہ وچ شامل کیتا ڳیا اَتے وزیر مملکت برائے دفاعی پیداوار مقرر کیتا ڳیا، جِتھاں انہاں فروری 2011 تئیں کم کیتا۔ جون 2012 وچ، انہاں کوں وزیراعظم راجہ پرویز اشرف دی وفاقی کابینہ وچ شامل کیتا ڳیا اَتے وزیر مملکت برائے دفاع مقرر کیتا ڳیا، جِتھاں انہاں مارچ 2013 تئیں کم کیتا۔

انہاں 2013 دے عام انتخابات وچ پیپلز پارٹی دے امیدوار دے طور تے حلقہ این اے-59 توں قومی اسمبلی دی سیٹ کیتے الیکشن لڑیا ہا، پر کامیاب نہ تھی سڳے ہن۔

14 ستمبر 2022 کوں، وزیراعظم شہباز شریف انھاں کوں اپݨی وفاقی کابینہ وچ معاون خصوصی مقرر کیتا۔ 6 اکتوبر کوں، انہاں اوورسیز پاکستانیز اَتے انسانی وسائل دی ترقی دے شعبہ دی قیادت دی ذمہ داری سن٘بھالی۔ انہاں کوں 9 دسمبر کوں وزیر مملکت دا درجہ ݙتا ڳیا ہا اَتے انہاں 10 اگست 2023 تئیں وزیراعظم دے معاون خصوصی برائے اوورسیز پاکستانیز اَتے انسانی وسائل دی ترقی دے طور تے کم کیتا۔

4 مئی 2024 کوں، صدر آصف علی زرداری سردار سلیم حیدر خان کوں پن٘جاب دے گورنر دے طور تے مقرر کرݨ دی منظوری ݙے ݙتی۔ 10 مئی 2024 کوں، انہاں پن٘جاب دے گورنر دے عہدے دا حلف چاتا۔