سردار خان بہادر اللہ بخش گبول

خان بہادر اللہ بخش خان گبول، جنہاں دا ڄم 15 اگست 1895ء کوں کراچی وچ تھیا تے وفات دسمبر 1972ء وچ تھئی، ویہویں صدی دے معروف سیاسی راہنما تے جاگیردار ہن۔ موجودہ لی مارکیٹ، صفورا گوٹھ، عبد اللہ گبول گوٹھ، چھٹہ خان گوٹھ تے گڈاپ دا علاقہ انہاں دی ذاتی ملکیت وچ شامل ہئی۔

ابتدائی تے اعلیٰ تعلیم

اللہ بخش گبول نے ابتدائی تعلیم کراچی وچ حاصل کیتی تے اعلیٰ تعلیم کیتے ممبئی روانہ تھئے۔ 1930ء وچ علی گڑھ مسلم یونیورسٹی توں گریجویشن دی ڈگری امتیازی نمبراں نال حاصل کیتی۔

سیاسی زندگی

اللہ بخش گبول نے عملی سیاست دا آغاز کانگریس وچ شمولیت نال کیتا۔ گورنمنٹ انڈیا ایکٹ دے نفاذ دے بعد اوہ سندھ اسمبلی دے پہلے ڈپٹی سپیکر بݨیے۔ 1937ء دے پہلے انتخابات وچ انہاں نے مسلم لیگ دے سر عبد اللہ ہارون کوں شکست ݙتی۔ اوہ ݙو واری 1935ء تے 1962ء وچ کراچی دے میئر رہے۔ انگریز دور حکومت وچ انہاں کوں "خان بہادر" دا خطاب ݙتا گیا۔ پاکستان دے معرض وجود وچ آوݨ دے بعد 1966ء وچ صدر ایوب خان دی طرفوں انہاں کوں "ستارہ امتیاز" نال نوازا ڳیا۔

سماجی خدمات

اللہ بخش گبول نے کراچی تے سندھ دے غریب خانداناں کوں زمیناں عطا کیتیاں۔ ٻہوں سارے سکول تے ثقافتی مراکز انہاں دے ناں نال منسوب ہن، جنہاں وچ لیاری دا مشہور "گبول پارک" وی شامل ہے۔ اوہ کراچی سول ہسپتال دے اعزازی سیکریٹری تے خزانچی، کراچی حج کمیٹی، موہتا آئی ہاسپتال، لیڈی ڈفرن ہسپتال دے انتظامی ممبر تے کراچی دے میئر دے طور تے خیراتی کمیں وچ ودھ چڑھ کے حصہ ڳھدے۔

بلوچ لیگ دی بنیاد

بلوچ قومی شعور کوں اجاگر کرݨ کیتے کراچی نے اہم کردار ادا کیتا۔ کراچی وچ بلوچ لیگ دے ناں نال ہک قوم پرست جماعت تشکیل ݙتی گئی۔ غلام محمد نور الدین پہلے صدر بݨیے تے ݙوجھے سرکردہ عہدے داریں وچ واجہ عمر بخش سبیرا، محراب خان، مولانا عبد الصمد سربازی، خان صاحب عثمان، خان بہادر اللہ بخش خان گبول تے پیر بخش شہداد شامل ہن۔