سرداری
اسیݙی وستی دھریجہ نگر دا ہک نینگر پھلکا تے اَلوچ بݨیا ودا ہا ، ہر ہک نال خوئے بازی کریندا ہا ، مل ملازم ہا ، شفٹ ءِچ کوئی عہدہ ملیا ہس ، ݙاݙے سئیں آکھیا اوندا قصور کینھی ، اونکوں سرداری تلے نی آوݨ ݙیندی ۔ مثال سُݨایونے جو گدڑیں کوں کتے روز پئے ویندے ہَن ، گدڑیں صلاح کیتی جو کُتیں نال جنگ کیتے ہک مہاندرا تے سردار بݨائوں ، ہک سردار بݨ ڳیا ، ٻئے گدڑ آکھیا سردار دا پتہ کیویں لڳسے ، تریجھے صلا ݙتی جو ایندے پُچھ تے پچھوں چھڄ ٻدھو ، ٻے ݙینھ کُتے پئے ڳے ، سارے گدڑ بھڄ تے اپݨے اپݨے گھوریں ءِچ وڑ ڳے ، سردار کوں اَکھیونے وڑ آ اوں آکھیا میں کیا کراں میکوں سرداری نی آوݨ ݙیندی۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان