سراپ
پیارے لال جام پوری ہندوانہ عقائد تے مبنی اے مثنوی شاہ جہاں دے عہد وچ بکرمی 1784بمطابق 1728ء مکمل کیتی۔(186)۔ پیارے لال مثنوی دے چھیکڑ وچ ایندا سن تصنیف تے اپݨا ناں ٹھکاݨہ ایں بیان کریندن۔
لکھیا اینویں لکھݨ ہار
جو ہے ہر دا پالݨ ہار
چھٹیا دیس ملیا پردیس
متھے آئے کیش کلیش
جاں پُر(جامپور) کیتا آکر واس
ݙینہاں راتیں جی اُداس
’’ستاراں سو چراسی‘‘ یار
لکھیم کتھا کر وچار
سماں شاہی شاہ جہان
لُلہ ڳوت اساݙی جان
ہن بلوچ اتھاں چودھار
لُٹن مارن جنھاں دی کار
ݙیس اساݙا ہا کرنال
نانواں میݙا پیارے لال
مثنوی دا قصہ ایں ہے کہ ہک واری راجہ رام چندر دے پیئو ہرݨ دے بھلیکے وچ ہک دیہاتی نینگر کوں تیر مار تے مار سٹیا۔ نینگر دے ٻڈھڑے پیئو اونکوں پلوتا ݙتا کہ او وی اوندی کار اپݨی اولاد دی جدائی وچ مرسے۔ کافی مد بعد راجہ دسرت دی ذال کیکئی اپݨے پتر رام چندر تے کوڑا دودھ ٻدھ تے رام چندر تے لچھمن کوں 12سالاں دا بن بانس ݙوا ݙتا تے ایں طرح اوں پلوتے مطابق راجہ دسرت اپݨی اولاد دے غم وچ جُکھ جُکھ تے مر ڳیا۔ ایں مثنوی وچ ہندی بھاشا الفاظ دی کثرت ہے۔ ہر واقعہ دے کیتے انج انج بحر اختیار کیتی ڳئی ہے۔
رام چندر دی تخت نشینی والی رات جشن دی کیفیت:
دیپ جلائے ہر نر ناری
جگ مگ جگ مگ دھرتی ساری
دھرتی تے آکاش دی جوتی
تارے تارے موتی موتی
پر جاگیت خوشی دے ڳاوے
راجہ دسرت انگ نہ ماوے
رام دے سر تے مکٹ رنگیلا
لچھمن پھردا چھیل چھبیلا
سیتا گھونگھٹ وچ مُسکاوے
وچ رن واس دے پیلاں پاوے
ہوئی اجودھیا نار نویلی
جیویں سنڳیاں وچ سہیلی
کیکئی ویس وٹائے میلے
رووے گھر وچ کر انویلے
رووے ڈھاوے تے کُرلاوے
بھرت کوں راجہ کون بݨاوے
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان