سرائیکی ہووݨ دا فخر

میکوں سرائیکی ہوونڑ تے فخر ہے ۔صدیاں توں محروم وسیب جئیندے نال آپڑیں پرائے ظلم کریندے آئن ایں قوم گونگیں وانگوں شانداں ڈے کے احتجاج کیتے ۔قلم دے زریعے کہیں ویلھے کالم دے رنگ ءچ کھیں ویلھے شاعری دے رنگ ءچ ۔ایندے ہتھ ءچ پیار دا گانا بدھا آئے بلوچستان دے بلوچیں کوں حقوق نیں ملیے ایندے ءچ کوئ شک نیں۔ اُنھیں حقوق دی جنگ بندوخ نال لڑی ہے جڈاں ہتھیار آپڑیں دے ہتھ ءچ آ ونجن پچھیں دشمن دا کم سؤکھا تھیندے اُو انھیں ہتھیاریں نال آپڑیں دے ہتھو آپڑیں مروا ڈیندے ۔نتیجہ تباہی ڈُھائیں پاسے آپڑیں دی ۔ میکوں میڈے وسیب کوں اگر شکایت ہے تاں حکمرانیں کنے ہے میکوں پاکستان کنیں کوئ شکایت نیں ۔مصیبت اے ہے اکثرقوم پرستیں کوں اے سمجھ کائینی کہ گلا شکوہ تاں حکمرانیں نال کرنڑے تساں سیدھا دھرتی ماء کوں مندے کڈھنڑ لگ ویندے ھاؤ تھاڈی قوم پرستی تاں ایں ملک نال جڑی ہوئ ہے اگر اللہ نہ کرے ملک نہ ریھا کیرھا حقوق کیرھی قوم ۔ پشتون تے ظلم تھئے کوئ شک نیں ۔مگر میڈے سامنڑے دی گال ہے طالبان دے بارے جڈاں میں کہیں پشتون دے سامنڑے گال کراں ہا پٹھانڑ مارنڑ تے تُل ویندے ہن ۔طالبان کوں ولایت دی کرسی تے بلہا کے صدقے واری تھیندے ہن ۔کجھ مہینے بعد اوہے پٹھانڑ طالبانیں کوں چولے چاء چاء بددعائیں ڈیندے ہن ۔اج ولا اوھے پٹھانڑ اوں راستے تیں نویں درندیں دے پچھو لگ کے تباھی دے رستے تیں ویندے پئین ۔ میکوں سرائیکی ہوونڑ تے ناز ہے ۔میڈے وسیب واسی دے ہتھ ءچ بندوخ ہے مگر ماء دھرتی دی حفاظت کیتے ۔اگر زمینی حقائق ڈیکھوں تاں ساڈا وسیب فاٹا وانگوں محروم ہے میڈے وسیب دے بچے بُکھ نال مردن ۔تس نال مردن ۔چھل نال مردن ۔قحط نال مردن ۔ ہاں میکوں گلہ ہے آپڑیں سرداریں کنیں ۔گدی نشینیں کنیں ۔غاصب وڈیریں کنیں لٹیریں ایم این اے کنیں ۔مطلب پرست عداوت پرست ایم پی اے کنیں ۔میکوں شکوہ ہے قوم پرستیں کنیں جنھیں کہیں ویلھے سندھی دی پوجا کیتی ہے کہیں ویلھے پنجابی مہاجر دی بانھ پکڑی ہے۔صرف استعمال تھیندے رہن ۔ ۔لیکن میکوں دھرتی ماء کنیں کوئ گلہ نیں ۔میڈا ملک میڈا مانڑ ہے رب دا تحفہ ہے ایکوں جیرھا بھینگی اکھ نال ڈیکھسی میڈی نظر ءچ اُو نطفہ حرام دا ہے ۔بھانویں آپڑیں ناں نال جیڈے القاب لئ ودا ھووے۔۔۔۔۔۔۔جمیل بلوچ