سرائیکی کلچر ݙین٘ہ

سرائیکی کلچرل ݙینہہ 6 مارچ

کئیں وی سماج ئچ علم، عقائد ، فنون ، قانون، ریت رواج تے ٻئیاں ساریاں صلاحیتاں ڄیڑہیاں انسان اوں معاشرے دے ہک فرد ھووݨ نال سکھدے او اوں معاشرے دا کلچر سݙیندے۔

دریائے سندھ دی مݨ تے پروان چڑھے سرائیکی وسیب دی خوش بختی جو ایتھوں دا واسی پراݨ مدت توں زراعت ، تجارت کیتے دریائے سندھ کوں اپݨا وسیلہ بݨائے۔ دریائی مݨ تے کندہیاں نال تل، مٹر ، کجھور تے کپاہ ڄتھاں وسیب واسی کوں خوشحالی ݙتی اوتھائیں دریائے سندھ دے پاݨی تے کانہہ ، کانے تے کوندر کوں ملا کے کشتی ٻݨی تے ول اساݙے موہاݨے  تجارت دا مرکزی کردار ٻݨے۔

لاجورد پتھر (Lapis lazuli) دے نال لوݨ دی ترسیل وی انہئیں دریائی پتݨاں نال تھیندی رہی  تے  سنسکرت دا سندھو لاون لوݨ دے طور تے اج وی اساݙی زبان دا حصہ اے۔ ایندے نال لاجورد دا نیلا رنگ وسیب دے آرکیٹیکچرل ارتقاء تے پہناواں دا نویکلا حصہ اے۔

زراعت ئچ ایتھوں دے واسی دا وکھرپ ݙاند ہا تے ایندے نال عقیدت ہڑپہ تے موہنجوڈارو چوں نکلی ہر seal  تے ݙاند دے مجسمے نال نشابر تھیندے۔  اے محبت وسیب ئچ تھیندے ݙانداں دے ہر میلے ئچ اج وی موجود اے۔

دریائے سندھ ڄتھ سرائیکی وسیب کوں معاش تے زراعت ئچ خود انحصاری ݙتی اوتھائیں ایندے کرشماتی اثر وسیب دے واسیاں کوں انسانی مساوات تے عدم تشدد دا ایں گرویدہ ڄوڳ  ڈتے جو کئیں دی موت کووں وی اے مرݨ دی جھاہ تے ٹر ونڄݨ یا ایں پیرائے ئچ کریندن۔

اللّٰہ سوھݨے دی مرضی

رب دا سݙا

ساہ مک ڳئن

ایں فکر دا اثر اے جو وسیب دے درویش ، فقیر ، جوگی کتھائیں  سات پنتھ ئچ ملدن  تاں کتھائیں دریا نال عقیدت توں دریا پنتھی ݙسدن تے ول اے درویش ݙھڳ سارے سلسلہ طریقت دے صوفیاء دیاں پرامن بقائے باہمی ، وسیبی سرگرمیاں دا وکھرپ ہن  جیڑہا سرائیکی وسیب دی ڈائیورسٹی دا بہوں وݙا وݙپ اے۔

سید جاوید شاہ بخاری

جیوے سرائیکی جھوک

6 مارچ 2023 سرائیکی کلچرل ݙینہہ

#SaraikiCultureDay