سرائیکی پڑھݨ
میݙے ابے سئیں کوں سرائیکی نال ݙاݙھی محبت ہئی ،دیوان فرید، سیفل نامہ تے قلمی کلام ٻہوں ہا، ابا سئیں پڑھݨ دے بعد پڑھاوݨ شروع کر ݙتا ، شادی توں وی پہلے اُستاد ہن ،اے سارو کجھ فی سبیل اللہ تھیندا ہئی ،روزی روزگار دا سلسلہ اُنہاں دے ݙو کم ہن ہک دوکان ݙوجھا مال مویشی ، ٻال پڑھیندے ہن دکانداری کریندے ہن تے ٻکریاں پلیندے ہن ،نال نال ٻکریاں دا وپار وی کریندے ہن ۔ ایں سانگے پا پیسہ اُنہائیں کول رہ ویندا ہا ، شہر دکان دا سودا گھنݨ ونڄن ہا تاں کئی نہ کئی کتاب گھٖدی اَمدے ہن ، کتابیں دی صندوق بھری پی ہئی ، اساں کتابیں ء ِ چ اَکھ کھولی ۔پڑھائی ویلے اُستاد تختیاں لکھویندے ہن ،ابا سئیں آپ پوݨے پا ݙیندے ہن ،کانے دیاں قلماں گھڑ ݙیندے ہن ،وَلا وَلا قلماں پھریندے ہاسے ، کولے نال کندھیں تے وی لکھدے ہاسے، خط وی چنڳا تھیندا ہا تے لوظیں دی سُنڄاݨ وی پمدی ہئی ، ابا سئیں خود مولود تے کافی پڑھدے ہن تے وسبے دے ڈھیر سارے مولود ،کافیاں تے سیفل پڑھݨ آلے ابے سئیں کول اَمدے ہن۔ وستی دے وچ ہر سال وݙا جلسہ رِجبی دا جلسہ ہوندا ہا ،اساݙی وستی دی مسیت ء ِ چ ہر جمعہ ہک جلسہ بݨ ویندا ہاتقریر وی تھیندی ہئی تے مولود وی پڑھیے ویندے ہن۔علمی ماحول دی وجہ توں نِکے لا توں میکوں ڈھیر ساری چیزیں دی سمجھ آ ڳی تے کتابیں دے لوظ جوڑ جوڑ تے پڑھدا رہ ویندا ہم تے ہولے ہولے میݙی پڑھائی دی رفتار اتنی تھی ڳی جو سرائیکی کتاباں فر فر پڑھ گھندا ہم ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان