سرائیکی پاکستان دے اندر حق منگدے

ہک اخباری خبر مُوجب ہک شاعرہ ‘ ہک دانشور ‘ ہک تریمت کوں سرکاری طور تے 20واں گریڈ ݙے کے سرکار دی اُونویں نُو نہ بݨا ݙتا ڳے جیویں پہلے سرکار دے ڄنوائی ہِن۔

خبر اِچ ݙسّیا ڳے جو اُردو دی شاعرہ فہمیدہ ریاض کوں پاکستانی سرکار ‘ سرکاری نوکری ݙے ݙتّی ہے ‘ اَڄ کل فہمیدہ ریاض کھیݙاں تے ثقافت دی وزارت اِچ 20ویں گریڈ اِچ مشیربݨ کے گزارہ کریندی پئی ہے۔

خبر پڑھ کے ہاں ٹھر ڳے ‘ ہک ویلا اوہ ہا جو ہندوستان اِچ ݙوجھی سرائیکی کانفرنس دِلّی اِچ تھیوݨ دا اعلان تھیا ۔ پاکستان دے پنجابی دانشوراں دیاں چھرکیاں نِکل ڳیاں … اسلام خطرے اِچ آڳیا … کشمیر لوݙے کھاوݨ پئے ڳیا … سرائیکی دانشور را دے ایجنٹ تے دھرتی دے دشمن سݙیجݨ پئے ڳئے … ہندوستان دے سرائیکی کانفرنس دے مہاندریاں دے گھراں اُتّے ہندوستانی انٹیلی جنس دے مہاندرے پٻاں دے بھار آوݨ پئے ڳئے … پاکستان دے ہندوستان وچکار تعلقات دا آخری ٹانکا ایہو بݨ ڳیا جو سرائیکی کانفرنس ملتوی کرائو ناں تاں جنگ تھی ویسی۔اَخیر کانفرنس ملتوی کرا ݙتی ڳئی … پنجابی بیورو کریسی اَتے پنجابی دانشوراں دے دِل دے دھڑکارنارمل تھی ڳے تے چیتا جاء تے آڳیئونیں … پاکستانی وزارت خارجہ اِچ تھرتھلی بند تھی ڳئی … ایں طرحاں کشمیر کمیٹی دا ادّھا کم مُک ڳیا بلکہ اَدّھا کشمیر فتح تھی ڳیا ۔ نِت آلی کار سرائیکی لوکاںایہ ڳالھ وی ہاں تے ناں رکھی ۔چلو پہلے مُلخ پِچھیں سرائیکی …

پر آفرین ہے فہمیدہ ریاض دی حُب الوطنی دی جو اوہ ناں تاں ’’را‘‘ دی ایجنٹ ہے ناں اوندے ہندوستان ونڄݨ نال کشمیر دا مسئلہ لوݙیں وات آندے… ناں اوندی اُتھاں ملازمت کرݨ نال پاکستان دی وزارتِ خارجہ دے ہاں دا دھڑکار ودھدے… ناں اُوندے گھر اُتّے انٹیلی جنس دے لوک آئے ݙسدن۔

لوک اندھے نھیں اوہ ڄاݨدن جو ضیاء الحق دے زمانے فہمیدہ ریاض ہندوستان چلی ڳئی ہئی۔ اُتّھاں اُوکوں سرکاری ممھان بݨا کے رکھیا ڳیا ہا۔ اُونیں پاکستانی ریاست دے برخلاف بیان وی ݙتے ہَن۔ وَل اُتھاں نوکری وی کیتی ہئی۔ ایں سمجھو اُتھائوں دی شہریت گھن گھدی ہئی۔ وَل دور بدلیا ‘ بندے بدلے ۔ کُرسیاں بدلیاں تاں اوہ پاکستان آ ڳئی ۔ ناں را دی ایجنٹ سݙیجی … ناں اُوندی وطنی محبت اُتّے شک تھیا۔ ہندوستان سرکار دی نوکر کوں پاکستانی سرکار اِچ نوکری مِل ڳئی۔

ہُݨ پاکستان دی ریاست اُتّے قابض پنجابی کیوں نھیں ٻلیندے… اوکوں وطن دشمن کیوں نھیں آہدے … سرائیکی ہندوستان ونڄ کے وَل آوے تاں وطن دشمن ‘ اتے اُردو ‘ پنجابی آلا ہندوستان اِچ نوکری کرکے وَل آ کے اِتھّاں نوکری کر گھنّے تاں وی وطن دا ہیرو۔

سرائیکی دا قصور ایہو ہے جو پاکستان دے اندر حق منگدے اَتے ٻاہروں مدت نھیں منگدا … اَتے اُردو ‘ پنجابی آلا ہندوستان اِچ کانفرنساں بھڳتاوے ‘ نوکریاں کرے ‘اعزاز تے ایوارڈ گھنّے ۔ اَتے وَل وی محب وطن۔

بھلا گروان ہووے تاں

(1996ء)

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان