سرائیکی پاکستان دی سب توں وݙی قومیّت ہے

پچھلے ݙیہاڑیں ’’پاکستان‘‘ اخبار وچ ہک کالم نظر ے جیندا سِر نانواں ہے ’’دستک‘‘ ۔ ایں کالم دے لکھاری آفتاب احمد خان ہِن۔ کالم نگار کالم وچ لکھے :

سرائیکی علاقے دے لوکاں دی محبّت ‘ اُنھاں دی زبان سرائیکی دے مٹھاس اَتے ایں علاقے دے لوکاں دی محرومی موجود ہے ۔ کالم نگار دا تعلق لہور نال ہے ۔ شکر ہے جولہور دا وسنیک سرائیکی علاقے دے درد کوں سمجھݨ لڳ ڳے اَتے اوندا ذکر وی  کریندے اَتے سرائیکی علاقے دی زبان کوں وی پیار تے محبت دی علامت سمجھدے۔پر میکوں حیرانی اُوں ویلے تھئی جہڑیلے اوں کالم نگار اَخیر اِچ لکھیا:

’’سُنا ہے سرائیکی بھائی پاکستان سے بہت محبت کرتے ہیں‘‘۔

اِتھائوں نظر آندے جو کالم نگار دا تعلق کئیں پناہ گیر ٹٻر نال ہے اَتے ایندے  پچھلے ہندوستان کنوں آئے ہوسِن تہوں تاں اِیکوں آپݨی پاکستانیّت یقینی اَتے ٻئے دی پاکستانیّت سُݨی سُݨائی نظردی ہے ۔ اِنھاں کوں اِی نھیں ٻئے وی ٻہوں سارے مہاجراں کوں اوہ ویلا بُھل ڳے جہڑیلے اِنھاں دے تن تے کپڑا نہ ہا ۔ کھاوݨ کوں روٹی نہ ہئی ‘ رہݨ کیتے کُئی تِڑ تاݙا نہ ہئی اَتے ایہ لوک جاء دی ڳول اِچ سرائیکی علاقے اِچ اَن وڑے ہَن ۔ سرائیکیاں اِنھاں دے کھاوݨ کیتے دیڳاں چاڑھیاں ‘ زردے پُلاء تے قورے اِنھاں کوں کھوائے ۔ ہندوآں دے بند مکاناں دی نشاندہی کرکے اِنہاں کوں تاݙے ݙتّے ۔ وِچھاوݨ تے پاوݨ کیتے سمان پلّوں ݙتّا۔ کاروبار کیتے آپݨے مکاناں ‘ دکاناں دے اڳوّں ٻہݨ تے چَھٻا لاوݨ دی جاء ݙتّی ۔ حکومت طے کیتا ہا جو ہندو آں دیاں چُتھائی جائیذاتاں مقامیاں کوں ݙتیاں ویسن۔مقامی اِنہاں جائیِذاتاں دیاں وی قربانیاں ݙتّیاں ۔ ملتان ‘ بہاول پور ‘ دیرہ غازی خان ڈویژناں دے علاوہ سارے سرائیکی وسیب جھنگ ‘ سرگودہا ‘ میانوالی تئیں مہاجر کھنڈ ڳئے ۔ کتھائیں اِنھاں دا راہ نہ ݙکیا ڳیا۔ نواب بہاول پور ‘ قائد اعظم کوں کار ‘ کوٹھی تے ملک چلاوݨ کیتے خزاناں ݙتّا ۔ ایں بھری بُھکَنّی ریاست آپݨاں سب کجھ پاکستان کیتے قربان کیتا ۔ ایہ تئیں جو ریاست کوں پاکستان اِچ رَلا کے آپݨاں ہتھ ہر شے کنوں چا گھدا ۔ حکومت پاکستان کوں ریاست دی زمین مفت اِچ کیا مِلّی ۔ اسلام آباد ‘ تربیلا تے منگلا دے سارے لوکاں کوں متبادل بھوئیں تے رقبے ریاست اِچ اِلاٹ کیتے ڳئے ۔ تربیلا ‘ منگلا تے اسلام آباد دیاں اُساریاں دے سارے معاوضے سرائیکی وسیب آپݨی بھوئیں ݙے کے ادا کیتے اَتے اَڄ آفتاب احمد خان لکھدے جو سُݨیا ہے سرائیکی پاکستان نال محبت کریندن۔

نظردے جو کالم نگار محبّت ‘ دے تصّور توں اِی واقف کوئنیں ۔ اوندے نزدیک پاکستان دیاں نوکریاں اُتّے پہلے مہاجراں دا قبضہ کرن‘ وَل نویاں نوکریاں چاچیاں‘ مامیاں‘ پُتراں ‘ بِھرانواں ‘ بھتریجیاں ‘ بھنڑیجیاں تے سوتراں مساتاں کوں ونڈݨ اِی وطن نال محبت دا اظہار ہے۔

کالم نگار دے نزدیک شت جعلی کلیماں نال زمیناں ‘ رقبیاں ‘ کارخانیاں ‘ دُکاناں  ‘ جائیذاتاں اُتّے قبضہ کرݨ اِی وطن نال محبت ہے۔

شت کالم نگار دے نزدیک ٹیکس چوری کرݨ ‘ ملاوٹ کرݨ ‘ ہیرا پھیری دا دھندا کرݨ ‘ بھنگ ‘چرس ‘ افیم تے ہیروئن نال بینک بیلنس بݨاوݨ اِی وطن نال محبت ہے۔

شت قبضہ گروپ بݨاوݨ ‘ ݙوجھے ملکاں دی ایجنٹی کرن‘ سمگلنگ کرکے ݙوجھے ملک اِچوں مال آنݨ تے مال پُچاوݨ اِی وطن نال محبت ہے۔

یاد  رکھائے سرائیکی پاکستان دی سب توں وݙی قومیّت ہِن ۔ اِنھاں دی زبان سارے پاکستان یعنی چونہاں صوبیاں اِچ ٻولی ویندی ہے ۔اِنھاں داعلاقائی بارڈر کئیں ٻئے مُلک نال نھیں لڳدا ۔ ایہ جتّی وطن نال محبت رکھدن کُئی ٻیا سوچ اِی نھیں سڳدا ۔ سرائیکی لوکاں کوں حب الوطنی دا سرٹیفکیٹ کئیں ٻئے کنوں نھیں گھنݨاں ۔ جیکر ایہ پاکستان کیتے ووٹ نہ ݙیون ہا تاں پاکستان کیویں بݨے ہا ۔ البتہ مہاجراں کوں وطن نال محبت دا سرٹیفکیٹ سرائیکی اِی ݙے سڳدن۔

بھلا گروان ہووے تاں

(20۔جولائی 1996ء)

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان