سرائیکی وسیب دے کھݙے

لاہور دیاں شیشے دیاں سڑکاں تے سرائیکی وسیب دے کھݙے

ہک اخباری خبر موجب لاہور کیتے 178کروڑ دا پیکیج بے نظیر بھٹو کوں بھیڄیا ڳے‘ جیندے وچ سڑکاں اُتّے ٹیوب لائٹاں لاوݨ دے پروجیکٹ وی شامل ہِن۔ ایں پروجیکٹ دی منظوری دے بعد لاہور دیاں پکیاں سڑکاں ‘ لوہے وانگ ٻیاں پکیاں تھی ویسن۔اِنہاں سڑکاں کوں کُھلاّ ‘ سوہݨاں ‘ دِل چھکواں تے لہوریاں دیاں سواریاں کیتے ملائم ‘ سدّھا تے چمک دار بݨا ݙتا ویسی تاں جو لہوری اِنہاں سڑکاں توں لنگھِن تاں انہاں کوں دھاٻے دھوڑے ناں لڳن۔اُنہاں دی جان کوں سرور آوے ۔ اُنہاں دے دماغ دے فتور دی حکومت مخالف دُھدِّڑ ٻہہ ونڄے ۔ انہاں دیاں مُل مہانگیاں سواریاں ‘ وَنّووَن دیاں کاراں ‘ پجیرو ‘ سکوٹراں اَتے موٹر سائیکلاں دی عمراں ودّھے ۔ جہڑیلے سوار تے سواریاں دی عمر ودھسی تاں پکی ڳالھ ہے حکومت دی عمر ودھسی ‘ جہڑیلے حکومت دی عمر ودھسی تاں مُلخ دی عمر ودھسی اَتے ایں طرحاں مُلخ ترقی کر ویسی ۔لہور خوش حال تھیسی تاں پاکستان دا دِل مضبوط تھیسی اَتے جہڑے بُت اِچ مضبوط دِل ہووے اُوندا حونصلہ وݙا ہوندے۔

لہور یاں کوں سوہݨیاں سڑکاں دا اے اِنام ایں ڳالھوں مِلدا پئے جو اِنہاں پچھلے الیکشن وچ اڄوکی حکومت دے دشمناں کوں ووٹ ݙتّے ہَن ۔ اِیں لِنڳوں اِنہاں کوں وڈھی دے طور تے سڑکاں تے بتیّاں دی سُوکھڑی ݙتی ویندی پئی ہے جو اے غلطی ولانہ کرن۔

لہور تے پنجاب کوں خوشحال کرݨ ہر حکومت دا فرض بݨ چُکّے ۔ ایں لنگوں جو لہوری کئیں ناں کئیں طرحاں حکومت اِچ وڑے رہندن ۔ نواز شریف وزیراعلیٰ ہا تاں اونیں وی لہور کوں بھریا۔ وزیراعظم ہا تاں وی او نیں لہوریاں کوں کھیر کھنڈوں کھوائیاں۔ وَٹّو آیا تاں او نیں وی لہور کوں سبھّو کجھ دان کیتا ۔ ہُݨ نکئی آئے تاں او نیں وی سبھّو کجھ لہور کوں ݙتے ۔

اے وزیر اعلیٰ تاں اُونویں وی سرائیکی علاقے دا ویری ہے ۔ اے ویر سب توں پہلے ایندے وݙے رنجیت سنگھ 1818ء اِچ سرائیکی وسیب نال کمایا ہا۔ اِیندے کنو ںسرائیکیاں کوں اُمیداں رکھݨ بے سود ہے ۔ پر ارمان ایں ڳالھ دا ہے جو ووٹ تاں حکومت کوں سرائیکی وسیب دا ڄٹ ݙیوے تے میوہ لہور دا پنجابی ڄٹ کھاوے ۔ بھل وو تیݙا انصاف!!! لہوری اَکھّیں ݙکھا کے سب کجھ گھن ونڄے ۔ اُوندا اُبھّا وی روشن ہووے ۔ اوندا لمّا وی جگ مگ کرے ۔ اُوندے پوادھوں وی روشنائی ہووے اُوندے پچادھوں وی لائٹاں ہووِن ۔اوندے سِر اُتّے رُشنائی ‘ اُوندے پیراں ہیٹھ شیشے دیاں سڑکاں ‘ اوندے اڳوں چندر تے تارے ۔

پر قصور تاں سرائیکی دا ہے ۔ ملتان ‘ بہاول پور اَتے دیرہ غازی خان دا ہے ۔ اِتھوں دے نصیب اِچ سڑکاں اِی کائنیں ۔ اِیندیاں سڑکاں اُتّے سیور دا پاݨی کھڑے ۔ سِکھّاں دے دور توں اُݙݨ آلی دُھدِّڑ ‘اَحٖ وی اِتھّاں اُݙدی پئی ہے ۔ لہور وچ دُھدِّڑ دا ناں کوئنیں ۔ ذری ہک کتھائیں مِٹّی اُݙے تاں ݙاک داراں کنوں رپورٹ لکھوا اخباراں اِچ چھپا ݙیندن جو اندھاریاں نال ساہ دیاں بماریاں تھیندیاں پئین ۔ واہ ووئے تیݙی نزاکت!!!

ہُݨ لہوری ایݙے ملوک تے نفیس تھی ڳئین جو اندھاریاں وی برداشت نھیں کر سڳدے ۔ رَب کوں اَکھا بھیڄن جو اندھاریاں آلا ساݙا حصّہ وی سرائیکی وسیب اِچ بھیڄ ݙے ۔ اُونویں وی سرائیکی وسیب اِچ پہلے وی وݙا اندھار گُھلّیا کھڑے ۔ لہوری اندھاریاں بھڄا ݙیسن تاں شودے سرائیکی اوہ وی جھل گھنسِن۔ پر لہوری یاد رکھّن ‘ رب تاں ݙیہدا کھڑے اَتے اوہ ݙاڈھا وی ہے ۔ جلال اِچ آ ڳیا تاں ککھ نہ رکھیسی۔

178کروڑ نال سڑکاں تے بتیاں دا اے پروجیکٹ وی لہوری گھن گھنّن تاں جو اُنھاں دا ڄٹ شہر وچ آوے تاں بتیاں تاں ݙیکھے ودا ۔ آپݨے کیتے اِنہاں کول لکھ ہنیں سرائیکی وسیب کیتے ککھ کائنیں ۔ کݙانہیں اِتّھاں آ کے ساکوں وی تاں ݙیکھو۔ ساݙی سیت دا پکھی اسلام آباد ونڄ ٻیٹھے ۔ اے پکھّی جیندے سِر اُتّے ٻہندے اُوکوں اسلام آباد پُڄا ݙیندے ۔ پہلے دِلّی وی ایہو پُڄا آنداہا ۔ ساݙے نصیب بُرے نھیں ‘ اَساں آپ بھولے ہیں ۔ ہر کئیں تے وِس پوندے ہیں۔ پر اڳاں تے ناں وِسسوں ۔ پنجابی حکمرانو! آپݨے گروان اِچ جھاتی پاوو ‘ پر تساں وی کیاکرو

بھلا گروان ہووے تاں

(1996ء)

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان