سرائیکی وسیب دے خطیبیں دے ناں

سرائیکی وسیب اچ تعلیمی اداریاں دی کمی دی وجہ نال وسیب دے لوک اعلیٰ تعلیم حاصل کرݨ توں محروم رہ ڳن ۔ اسیڈے کول علمی ادارے تاں اپݨی جاہ رہ ڳئے ،معلومات ݙیوݨ آلے افراد یا ادارے وی موجود کائنی ، ہُݨ وقت آ ڳئے جو وسیب دے لوک خاص طور تے خُطابی ( طلبہ تے طالبات ) اَکھ پٹن ، علم حاصل کرن ، معلومات دے سوجھلے نال اپݨے دل تے دماغ روشن کرن ، انہاں کوں ہک طرف نی بلکہ ہکے ویلھے چھی چھی پاسے ݙیکھݨ دی صلاحیت پیدا کرݨی چاہیدی اے ۔ انہاں دا نظر اُبھا، لمہ ، پواد ، پِچھاد ( مشرق ، مغرب ،شمال ، جنوب ) دے نال نال ہکے ویلھے عرش معلی تے دھرتی دے چھیکڑی حد ( تحت السریٰ ) تک ہووݨی چاہیدی اے ۔ سب توں اہم اے جو بصارت دے نال بصیرت وی ضروری اے۔

وسیب دے خطابی یاد رکھن جو اڄ جیرھا طبقہ اساݙے اُتے حکمرانی کریندا پے ، یا جیرھے طبقے کوں حکمرانی دا حق حاصل اے او گریجویشن دے بعد ’’ سی ایس ایس ‘‘ دا امتحان پاس کریندے تے ’’ سی ایس ایس ‘‘ بنیادی طور تے جنرل نالج دا امتحان ہوندے ، ایں واسطے خُطابیں کوں اپݨے کول علم دے نال نال معلومات دا ذخیرہ رکھݨ وی ضروری ہے ، ایں سلسلے اچ یاد رکھݨا چاہیدے جو ہر ٻال کوں اپݨی دھرتی تے اپݨے وسیب دی زبان تے انگریزی زبان تے کامل عبور ہووݨ ضروری اے ۔ جیرھے لوک اپݨے ٻالیں نال انہاندی ماء ٻولی دی بجائے ٻئی زبان اچ ڳالھ کریندن او اپݨے ٻالیں نال دشمنی کریندن تے ٻالیں دی ماء ٻولی کوں قتل کرݨ دے مرتکب تھندن ۔ ایجھے لوکیں دی سوچ چھوٹی ، پست تے گھٹیا ہوندی اے ۔ اے لوک احساس کمتری دا شکار ہوندن ،کیوں جو زبان ہک ٻہون وݙا علم اے ، تے سب توں پہلا تے وݙا علم گھر دی ماء ٻولی توں حاصل تھیندی اے ، ایں وݙے علم توں ٻالیں کوں محروم رکھݨ ٻہوں وݙی زیادتی اے ، وسیب دے بھرا سیاݨے تھیون تے وسیب دے ٻالیں کوں اپݨی ماء ٻولی دی برکت توں محروم تھیوݨ توں بچاون ۔

جیا سئیں ! ڳالھ تھیندی پئی ہئی جنرل نالج دی ۔ پڑھاکو ٻالو تے بھیݨ بھراوو ، بھانویں تُساں پڑھدو پہلی یا ہیوے ایم اے تے پی ایچ ڈی دے طالب علم ، تہاکوں کائنات دی ہر چیز بارے جٖاݨنا چاہیدے ، کیونجو علم دا مطلب ای جٖانݨ ہوندے ۔ اساں جیڑھی دنیا اچ رہندے پیوں اوندے بارے کجھ موٹیاں موٹیاں علمی تے معلوماتی ڳالھیں تہاکوں ݙسیندوں ، تُساں انہاں کوں اپݨے پَلے ٻدھو تے علمی میدان اچ کامیابیاں حاصل کرو۔ کیونجو ڄانݨ دی جستجو اساݙے مذہب تے اساݙی ثقافت دا خاص حصہ ہے۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی وسیب) وچوں چوݨ