سرائیکی وسیب اچ پڳ دا تصور
سرائیکی وسیب اچ ‘‘ پڳ’’ کوں عزت تے آن دانشان سمجھیا ویندے اتے ‘‘ بوچھݨ ’’ کوں عزت و عصمت دی علامت تصور کیتا ویندے۔ ایہاوجہ اے جو پگ بنھاوݨ ، پگ وٹاوݨ اتے پگ لہاوݨ ساڈے وسیب اچ اہم واقعات دا درجہ رکھدن۔ ساڈے وسیب دی رسم اے جو گھر دے سربراہ دی وفات دے تریجھے ڈیہاڑے برادری دے نمائندہ لوک کٹھے تھی متوفی دے وڈے پتر دے سر تے پگ ٻدھیندن۔ جیندے نال او اپݨے کنبے دے سربراہ دیاں ذمہ داریاں سنبھال گھندے تے برادری دا ہک ذمہ دار رکن بݨ ویندے۔
ایندے علاوہ برادری تے قبیلہ اپݨےوچوں کہیں صاحب حیثیت بزرگ یا جوان کوں اپݨی برادری تے قبیلے دے وسیع تر مفادات دے تحفظ کیتے اپݨا ں وڈا مقرر کریندن ایں فیصلے دے اعلان تے نفاد کیتے کٹھے تھی کے پگ ٻدھݨ دی رسم ادا کریندن جیندے بعد او اپݨی برادری تے قبیلے دا وڈیرا بݨ ویندے۔ ساڈے وسیب دی ہک بئی رسم دے مطابق ساڈے جوان آپت اچ پگ تے پٹکا وٹا کے ہک ڈوجھے دے جگری یار تے بھرا بݨ ویندن۔ ایویں عورتاں بوچھݨ وٹا کے ہک ڈوجھے دیاں سہیلیاں تے بھیڑیں بݨ دیندن۔ ایندے علاوہ جوان کہیں تریمت کوں بوچھݨ پوا کے اپݨی بھیݨ بݨا گھِندن تے ول ایں مقدس رشتے کوں جیندیں تئیں نبھا کے ڈکھیندن۔ پگ لہاوݨ توں مراد کہیں شریف دی ہتک کرݨ اےتے اے فعل بہوں برا سمجھا ویندے۔
حوالہ
[لکھو | ماخذ وچ تبدیلی کرو]سرائیکی افسانے تے ناول وچ دیہاتی منظر نامہ، تحقیقی و تنقیدی مطالعہ (مقالہ نگار: صبیحہ منظور ) نگران مقالہ ڈاکٹر مقبول حسن گیلانی