سرائیکی وسیب اچ رِیت تے روایت

سرائیکی وسیب اچ جاہ جاہ تے نیلے رنگ کوں پسند کیتا ویندے ۔ ملتانی کاشی گری دنیا اچ مشہور اے۔ ملتانی کاشی گری دے رنگ فیروزی تے نیلا ہے۔ سرائیکی اجرک  دے رنگ وی ایہے ہن ۔ انہائیں رنگیں تے انہائیں رنگیں دے پھل بوٹے  دی تریخ پنج ہزار سال اے۔

ظہور دھریجہ لکھدن

‘‘ سرائیکی اجرک دا رنگ نیلا ہے تے نیلے رنگ نال سرائیکی وسیب دا وڈا گانڈھا ہے۔ ہک تاں پوری دنیا وچ نیل دی کاشت تے باہر لے ملکاں کوں برآمد دا وڈا علاقہ سرائیکی رہ گئے ۔ ڈوجھا اے جو اساڈے سندھ دریا دا ناں‘‘ نیلاب ’’ وی ہے۔ بیا اے جو نیلے رنگ دے ویس کوں سرائیکی وسیب دا صوفیانہ لباس وی آکھیا ویندے ۔ اساڈیاں تریمتیں کپڑے دھووݨ ویلے چٹے کپڑئیں کوں نیل ڈیندئین ، تا ں جو کپڑے کوں سوبھ مل ونجے تے او صاف تے چمکیلا بݨ ونجے نیل دے خواص وچوں ہک میل کپݨ وی ہے۔ اساڈے وسیب وچ پگ کوں نیل ڈیوݨ ضروری سمجھا ویندا ہا تے نیل آلا پٹکا ٻدھݨ آلے کوں سرائیکی وسیب اچ معزز سمجھا ویندے ۔ تاریخی حقیقت اے وی ہے جو پوری دنیا اچ نیل دی پیداوار دا سب توں وڈا مرکز سرائیکی وسیب رہ گئے ۔ اج جیکوں صادق آباد آکھدن ایندا اصل ناں ٹھٹھ پاولیاں ہے۔ ایں سارے علاقے وچ نیل دی پیداوار تے اوندی تریخ بھری پئی اے۔’’  

حوالہ

سرائیکی افسانے تے ناول وچ دیہاتی منظر نامہ، تحقیقی و تنقیدی مطالعہ (مقالہ نگار: صبیحہ منظور )  نگران مقالہ ڈاکٹر مقبول حسن گیلانی