سرائیکی وسوں دا سنڄاپو شاعر
عبدالرزاق زاہد سرائیکی وسوں وچ سرائیکی صحافی وانگوں سرائیکی شاعری وچ ہک نمانڑاں،سنجاپو تے دھیمے خوبصورت لہجہ آلا شاعر ہے۔شاعری انسانی شعور دی معراج دا ناں ہے۔سرائیکی راوا، چولستان روہی،دمان وانگوں تھل کوٹ ادو سنانواں دھرتی دا نیگر عبدالرزاق زاہد جہناں دا پہلا شعری مجموعہ ''ڈو انگلیں اسمان '' اپنی بیمثال کلام دی وجہ نال سرائیکی شعری ادب وچ ہک انج سنجان بنا چکے۔ہن نواں شاندار سوھنے انذاز تے سادہ دل چھکویں خوبیاں نال بھریل نواں ڈوجھا شعری مجموعہ ''خدا دی وستی'' منظر عام تے آون کیتے تیار ہے۔ہک خوش آئند اضافہ ہے۔شاعری،شعور تے انسانیت دے خوبصورت ملاپ دا ناں ہے۔ سادہ،نفیس تے دل چھکویں الفاظیں دا سوھنا شاعری دی مالا ''خدا دی وستی '' سرائیکی شاعری ادب دے باغ وچ ہک گھاٹا ونڑ بن کے سامنے آسی۔''خدا دی وستی'' دراصل سرائیکی وسیب دا قدیم ہزاریں سالیں دا امن دا سنہیا ہے۔وڈی شاعری کیتے ہمیشہ عام سدھے سادے تخیل دا ہوون بہوں ضروری ہے۔ایہ خوبیاں میکوں عبدالرزاق زاہد دے مجموعے وچ نظرن۔محبت،احساس،ہمدردی،احترام آدمیت تے خلوص دا استعارہ خدا دی وستی ہے۔
توں محبت دے دعوے کریندا ودیں
تیئں محبت دا کوئی جام پیتا وی ہے
خزاں نہ رہسی خدا دی وستی
بہار آسی خدا دی وستی
میں ڈیکھ آیا ہاں باجھ میڈے
ہے بہوں اداسی خدا دی وستی
ہمیش سوجھل سویر ہوسی
ہمیش رہسی خدا دی وستی
کتھوں دا وسدا رزاق زاہد
تھیا ہے واسی خدا دی وستی
سرائیکی خطہ صوفیاء کرام دی خوبصورت جمالی تے جلالی وستی ہے۔اتھوں دا ہر انسان زاہد وی ہے تے محافظ وی ہے۔دلیر وی تے اشاک وی ہے۔ *خدا دی وستی * وچ امن، محبت واتحاد انسانیت دے نال امید دا فلسفہ نمایاں ہے۔سرائیکی شعری ادب وچ عبدالرزاق زاہد ہک نمانڑاں تے نمائندہ شاعر بن کے میڈے سامنے آئے۔ادب دی انتہاء حیرت ہے۔میکوں بہوں حیرت تھائی جو دریا کوں کوزے وچ اعلی معاشرتی اقدار کوں شاندار خوبصورت انذاز وچ خدا دی وستی یعنی سرائیکی دھرتی دا خلوص بھرا دا فلسفہ امید بیان کیتا گئے۔میں عبدالرزاق زاہد کوں مبارکباد پیش کرینداں جو سرائیکی ادب ودھارے وچ تہاڈا ناں ہمیش خدا دی وستی وانگوں زندہ راہسی۔
دعا گو *محمد الطاف ڈاھر *
صدر شعبہ سرائیکی
گورنمنٹ صادق عباس گرائجوئٹ کالج ڈیرہ نواب صاحب احمد پور شرقیہ ضلع بہاولپور
(سرائیکی وسیب)
حوالہ
[لکھو | ماخذ وچ تبدیلی کرو]کتاب: خدا دی وستی ، مصنف : عبدالرزاق زاہد ، جھوک پبلشرز ملتان