سرائیکی مرثیہ. ملتان وچ مرثیے دا آغاز
سرائیکی زبان دے شعری تے نثری ادب دا ٻہوں وݙا حصہ واقعات کربلا بارے ہے ۔ جتھاں تئیں سرائیکی مرثیہ نگاری دا تعلق ہے سرائیکی علاقیاں وچ واقعہ کربلا (61ھ) دا ذکر ایندے فوراً بعد تھی ڳیا ہئی۔681ھ وچ دت قوم دے لوگ کافی تعداد اِچ عرب ونڄ آباد تھئے ۔ کربلا دے واقعہ اِچ انہاں دتاں نے حضرت امام حسین علیہ السلام دا ساتھ ݙتا ہئی۔ ایں موجب یزیدیاں دے ہتھوں تنگ تھی تے انہاں کوں عراق وچوں نکلݨا پیا تے او ایران توں تھیندے ملتان تے دیرہ غازی خان تے دیرہ اسماعیل خان دے علاقیاں وچ آباد آن تھئے۔ دت موہل برہمناں دی ہک قدیم شاخ ہے ۔ کورو پانڈواں دا اتالیق درون اپارج ہیں قوم دا فرد ہئی‘ تے ایہو مہا بھارت دی جنگ دا سپہ سالار ہئی۔ دت ہیندی اولاد ہن۔(1)اے دت پورے سرائیکی علاقے اِچ کھنڈیے ہوئے ہن۔ اپݨے ڳل وچ کربلا دی جانثاری دی یادگار دے طور تے سرخ پٹے دا نشان لیندے ہن تے ڳلی ڳلی قدیم رلوڑ ملوڑ زبان اِچ واقعات کربلا بیان کریندے ہن۔ انھاں علاقیاں وچ انھاں کوں حسینی ٻانبڑ (برہمن) سݙا ویندا ہئی۔اے او پہلے ذاکر ہن جنھاں شہدائے کربلا دے واقعات کوں اِتھوں دے لوکاں تئیں پُڄایا۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان