سرائیکی ماء ٻولی دی ترقی سانگے آواز چاؤ

ساہ دا وساہ کائنی ‘ بندے امدے ویندے رہ ویندن ۔ کہیں وی زبان دی ترقی واسطے اداریں دا وجود ضروری اے ۔ سرائیکی ماء ٻولی دی ترقی سانگے اپݨے طور تے کجھ ادارے کم کریندے پِن ، پر اداریں دی تعداد تے انہائیں دی کارکردگی کوں ودھاوݨ دی ضرورت اے ۔ سرائیکی مجلس بہاولپور ہِک ایجھا ادارہ ہا جیندے کول کروڑاں روپے دی زمین بلڈنگ تے جاہ ہئی پر اُتھاں ادب کوں اکھاڑہ بݨا ݙتا ڳے ۔وجہ اے ہئی جو ایں ادارے تے قبضہ بے ادب لوکیں دا امدا پے ۔ جے کوئی ادیب آیا وی ہے تاں انہائیں لوکیں اونکوں وی اپݨی راہ تے لا گھدے یا رہݨ نی ݙتا ۔ یونیورسٹیں دے وچ سرائیکی شعبے وی ادارے ہَن پر ہالی تک انہاں ڳالݨ آلا کم تاں کیتے بݨاوݨ آلا نی کیتا ۔ سندھی زبان دے ٻہوں سارے ادارے ہِن ، پنجابی زبان دے وی ٻہوں سارے ادارے ہِن ، حکومت توں گرانٹاں گھندن ، پنجابی کمپلیکس لاہور کوں ہِک ارب روپے توں زائد لاگت نال بݨایا ڳے۔ سینکڑاں ملازم اِن ، کروڑیں دا بجٹ اے ، ایں سارے پیسے دے وچ تہاݙا اساݙا حصہ وی ہے جو اساں جیرھے ٹیکس ݙیندوں ، پنجاب دے اللے تللے اتھاؤں تھیندن ۔ آکھیا ڳیا ہئی جو پنجابی ادارے دے ترائے شعبے تے ترائے دفتر ہوسن ، پوٹھوہاری واسطے پنڈی دے وچ دفتر ہوسے ، سرائیکی واسطے ملتان اچ دفتر ہوسے ، برابر فنڈ تقسیم تھیسن پر او ڳالھیں کتھاں ہِن ؟ اے سارا کوڑ ہئی ۔ ایں کوڑ دے زور تے ایں ادارے دا اسمبلی توں ٻل پاس کرا گھدا ڳیا ، ہُݨ او ساݙی رت اچ دھمدے ٻیٹھن ، اساݙے پیسیں نال اساݙی ماء ٻولی کوں لہجہ آکھ تے توہین کریندے ٻیٹھن ‘ سارے لوک چُپ اِن ، کوئی نی الیندا ، اے وی آکھیا ڳیا ہئی جو ایں ادارے دی طرفوں ملتان دے وچ ریڈیو تے سرائیکی ٹیلیویژن وی قائم تھیسے جیرھا سرائیکی زبان تے ثقافت واسطے کم کریسے ، راولپنڈی دے وچ ریڈیو تے ٹیلیویژن قائم تھیسے جیرھا پوٹھوہاری وچ کم کریسے ۔ اڄ او ریڈیو ٹیلیویژن کتھ اِن ، جݙاں جو انہاں اپݨے سانگے پنجابی ٹیلیویژن بݨوا گھدے تے او اساݙے خرچے تے چلدا پے ۔ اے ڳالھیں کون کریسے ؟ سیاستدانیں دے تاں منہ سیتے پِن ۔ سرائیکی لکھاری  دے لوک انہاں ڳالھیں واسطے آواز چاون ۔ کیوں جو شاعر تے ادیب قوم دی زبان ہوندن ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء