سرائیکی لوک قصیاں وچ شکاری

سرائیکی لوک قصیاں وچ شکاری دا کردار وی کتھائیں کتھائیں نظردے ۔ لکڑ ہارے کلی ایندا وی منظر نامہ جنگل ہے ۔ اے ٻہوں سیاݨے ہوندن ۔ زناور دا کھرا ݙیکھ تے ݙسا سڳدن جو ایہ کیڑھا زناور ہے ۔ نر ہے یا مادہ ۔ ڳبھݨ ہے یا لیاری تے انہاں دا نشانہ ایݙا ہوندے جو او اُݙدے پکھی کوں وی سٹ سڳدن۔ کݙاہیں کݙاہیں بادشاہ ، وزیر ، شہزادے وی شکار کھیڈݨ ۔ جنگل وچ پُڄدن شکاری نال نت نویں واقعات تے حادثات تھیندے راہندن جنہاں اِچوںنویاں نویاں کہاݨیاں ڄمدِن ۔ انہاں دی مہارت نال عجیب و غریب تے چسولیاں کہاݨیاں بݨدن ۔ طاہر غنی دی بیان کردہ کہاݨی ’’بھلو بھلی دا اَنت نئیں‘‘ وچ شکاری دی مہارت وی ݙیکھو تے اوندا کرتݨ وی۔شکاری ایݙے ذہین ہوندن جو شکار پاروں انہاں کوں جنگل ٻیلیاں تے روہی دے سفر کرݨے پوندن تے کئی ݙینہ، رات اُتھائیں رہ ویندن تے جنگل تے روہی دے وچ راتیں کوں راہ اَسمان تے تارے ݙیکھ تے ڳول گھندن تے منزل تئیں پُڄ ویندن۔

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ‘ ملتان