سرائیکی لانگ مارچ دا حال

ایس کیو ایم دی طرفوں لانگ مارچ دا اعلان تھیا .بی ٹی ایم ملز خانپور کٹھے تھیونڑ دا پیغام ڈتا گیا تاں پولیس وچ کھلبلی مچ گئی .اللہ آباد توں اساں ترائے بندے جیپ تے ٹر پیوسے, لیاقت پور توں پولیس اساڈے پچھوں لگ پئی تے اساڈا تعاقب کرنڑ شروع کر ڈتا, فیروزہ پجنڑ دے بعد لیاقت پور پولیس کھڑ گئی تے فیروزہ تھانڑیں دی پولیس اساڈا پیچھا شروع کر ڈتا. میڈے نال جیڑھے ڈوں بندے ہن او سرکاری ملازم ہن, او ڈر تے خانپور شہر وچ معزرت کر تے لہہ گئے. پر میں پیش قدمی کریندیں بی ٹی ایم ملز دے نیڑے پنم تاں پولیس ناکہ لائی کھڑی ہئی. میکوں روک گھدا ڈوں گھنٹہ میں پولیس تحویل وچ رہ گیم. جان چھٹنڑ دے بعد بی ٹی ایم ملز کنیں گیم تاں نہ کوئی بندہ تے نہ کوئی گاڈی. ول خانپور جھوک دے دفتر پج گیم اتھوں پتہ لگا جو ایس کیو ایم دی ساری قیادت بزرگ قوم پرست رہنما میاں عبدالخالق دے دیرے تے کٹھی ہے. میں اتھاں پج گیم .اتھاں پولیس دے خلاف تے سرائیکی صوبہ دے حق وچ شدید نعرے بازی کیتی گئی. (سراج احمد ساغر)