سرائیکی قومیت تے خطہ سرائیکستان دی دشمن شخصیتاں

خطہ سرائیکستان بشمول سابقہ صوبہ ملتان، ریاستہائے بہاولپور، بکھر، ٹانک وغیرہ، ہک انتہائی قدیم مگر سیاسی، معاشی، ثقافتی تے اقتصادی اعتبار نال ٻہوں اہم علاقہ اے۔ پچھلے وقتاں اچ اے خطہ اپݨی خوشحالی پاروں سونے دی چیڑی مشہور ہئی۔ سندھو، گھارا، راوی، بیاس، ہاکڑا تے چنانہہ جیہے دریاواں دے سنگم تے گزرگاہ ہووݨ دے کارݨ اے سارا علاقہ زرعی پیداوار دا ڳڑھ ہئی تے ایندے نال نال اتر ہندوستان دا ہک وݙا تجارتی مرکز وی ہئی۔ اتھاں تھیوݨ والی تجارت سکے رستیاں دے نال نال دریاواں وچ ٻیڑیاں تے چھوٹے بحری جہازاں دے ذریعے وی تھیندی ہئی۔ تجارت کیتے آوݨ والے کئی قافلے تے وݨکو وݨکی وپاری اپݨا وپار کرݨ آندے ہن تاں واپس وطناں تے ونجݨ دے بجائے اتھوں دے واسی بݨ ویندے ہن۔ ایویں ای اے سارا خطہ دولت، ملک تے حکومت دی ہوس وچ مبتلا حملہ آوراں دی زد وچ وی رہ ڳیا۔ انہاں حملہ آوراں وچ زیادہ تر او ہن جیہڑے آئے تاں اتھاں حملہ کرݨ ہن پر او اتھاں آ کے ، حملہ کر کے تے حکومت تے قبضے کر کے بجائے پچھلی راڄدھاݨی کوں ونڄݨ دے اتھاں رہ ڳئے تے انہاں دے نسلاں وی سرائیکی قومیت وچ ہمیشہ واسطے ضم تھی ڳئے تے سرائیکی وسیب نے وی انہاں کوں قبول کر گِھدا۔ یعنی سرائیکی وسوں وچ جیہڑا آیا ، بھاویں جیہڑی نیت نال آیا پر واپس نہ ڳیا تے سرائیکی بݨ کے وسیب وچ وس ڳیا تے اوندیاں اڳلیاں پیڑھیاں سرائیکی سݙیجیاں۔ ایں طرح سرائیکی وسیب راجپوت، ڄٹ، عرب، قریشی، آریائی، دیراوڑ، بلوچ ، پٹھاݨ، یورپی تے مہاجر جیہے وݨکو وݨکی نسلاں، برادریاں تے قبیلیاں دا ڳڑھ بݨیا تے سرائیکستان سݙیجا تے ہر آوݨ والے کوں اپݨے دامن وچ پناہ ݙیندا ریہا۔

پر ایندے نال ای تصویر دا ݙوجھا رخ اے ہے کہ سرائیکی وسوں دا واسطہ ایہو جیہے لوگاں نال وی پیا کہ جتھاں وسیب نے ہر کہیں کوں فائدہ ݙتا ، اتھائیں کجھ لوگاں نے ایندا قدیم وجود مٹاوݨ تک دا آہر وی کیتا تے اتھوں دے سرائیکی لوگاں کو معاشی ، سیاسی تے اقتصادی نقصان پہنچاوݨ دے نال نال انہاں دا خون کرݨ توں وی دریغ نہ کیتا جیندے مثالاں تاریخ دے ورقیاں وچ ہمیشہ واسطے محفوظ ہن۔ اے سرائیکی دشمن طاقتاں اڄ توں ہزاراں سالاں بتھے تاریخی صفحیاں وچ وی ݙسدن پر اڄ وی موجود ہن۔ انہاں دا مقصد اڄ وی سرائیکی دی سنڄاݨ تے وکھرپ دا خاتمہ کرݨا اے جیندے وچ اے پچھلیاں طرح نامراد تھیسن۔ پر سرائیکی قوم دے نینگراں کیتے انہاں دا نتارا ضروری اے تاکہ سرائیکی قوم دی ترقی تے خوشحالی دا سدھام تھیوے۔ (اسماعیل بھٹہ، 27 اپریل 2019ء)