سرائیکی شاعری وچ غزل گوئی

گھُنڈ کھلائی کتاب ”سرائیکی شاعری اچ غزل گوئی“جلد 3

لکھت؛  ؛واجدؔ تھلوی

گزریل رات انصارِ ادب دے زیرِ اہتمام، سرائیکی زبان دے معروف شاعر و ادیب،افسانہ نگار تے محقق سئیں فیضؔ بلوچ دی تحقیقی کتاب ”سرائیکی شاعری اچ غزل گوئی“ دی تریجھی جلد دی گھُنڈ کھلائی زیرصدارت جناب مسعود خان ارحم(لاہور) ای لائبریری ملتان اچ منعقد تھئی جیندے مہمانِ خصوصی جناب اکمل حنیف تے سئیں صادق فدا ہن۔جڈٖاں جو نظامت دے فرائض صابر انصاری تے محمد علی باہوش نے سر انجام ڈٖتے ایں تقریب داباقاعدہ آغاز تلاوتِ کلام پاک نال تھیا تے آنحضرتﷺ دے حضور نذرانہِ عقیددت وی پیش کیتا گٖیا۔

بعدازاں وسیم ممتاز ایڈو وکیٹ، جناب قاسم سہانی، عمران علی اعوان،غلام اصغر ساہی تے واجد تھلوی نے جناب فیضؔ بلوچ دی شخصیت و فن تے انہاں دی تحقیقی کتاب سرائیکی”شاعری اچ غزل گوئی“دی افادیت تے روشنی پاتی جیندے کولوں واضح تھیاجو ا یہ کتاب سرائیکی زبان اچ لکھی ونجٖنْ آلی غزل دی توانا تاریخ ہے۔ ایں حوالے نال راقم الحروف واجدؔ تھلوی دا آکھنْ ہا جو ”ایہ ہک علمی ادبی تصنیف ہے جیندے وچ  سرائیکی غزل دا ارتقاء تفصیل نال بیان کیتا گٖئے تے مختلف ادوار اچ سرائیکی غزل تے جنہاں شعراء نے محنت کیتی ہے انہاں دی خدمات کو سراہیا گٖئے میں فیضؔ بلوچ دی ڈٖینہ رات محنت دے سمل ”سرائیکی شاعری اچ غزل گوئی“ کوں سرائیکی ادبی زمین تے تحقیقی حوالے نال ہک اوہ اُچا پہاڑ اسمجھداں جیندا ناں ماؤنٹ ایورسٹ ہے“سئیں قاسم سہانی نے اپنْے خیالات دا اظہار کریندیں ہوئیں آکھیا جو ” فیضؔ بلوچ دے فیض دیاں کرناں پورے سرائیکی وسیب کوں سوجھلا ڈٖیندین ”سرائیکی شاعری اچ غزل گوئی“فیض بلوچؔدا ہک نویکلا کم ہے جیندے وچ انہاں کئی نامور شعراء دے نال نال وسیب دے گم نام تے نوجوان شعراء داکلام تے تعارف درج کیتے ایہ ادب دا بٖہوں وڈٖا کم ہے جیڑھا جوسرائیکی ادب وچ ہمیشہ یاد رکھیا ویسی“ سئیں وسیم ممتاز ایڈوو کیٹ نے ایں حوالے نال برملاآکھیا جو ”فیضؔ بلوچ نے جیڑھے انداز نال سرائیکی ماء بٖولی دی خدمت کیتی ہے ایندے نال الحمد للہ سرائیکی زبان دی جھولی غزل نال پُر ہے اساں آئندہ وی فیضؔ بلوچ توں ایہا توقع رکھدے ہیں جو ا وہ سرائیکی ادب کو ں اپنْی ادبی خدمات نال مزید بٖیا رنگیسن“

صاحبِ تقریب جناب فیضؔ بلوچ نے اپنْی عاجزی تے انکساری نال تمام شعراکاءِ محفل دا شکریہ ادا کیتا تے فرمایا جو”میں تاں اپنْے آپ کوں ایں قابل نہیں سمجھدا مگر دوست احباب نے میڈٖی حیثیت توں ودھ کرائیں میڈٖی تعریف کیتی ہے انہاں دے اظہارِ مسرت توں میکوں دلی خوشی محسوس تھئی ہے“

صدرِ محفل جناب مسعود ارحم دا آکھنْ ہا جو”ملتان شہردیاں محبتاں لاہورتوں مقاطیس آنگوں میکوں اتھاں چھِک اَئین میں منتظمین بالخصوص صابر انصاری کوں ایں تقریبِ پر وقار دی مبارک باد پیش کرینداں“

جڈٖاں جو کتاب دی گھُنڈ کھلائی دے نال نال محفلِ مشاعرہ وی منعقد تھئی جیندے وچ سئیں مسعود ارحم، سئیں فیضؔ بلوچ بابائے سرائیکی سئیں  خادم حسین مخفیؔ، سئیں اکمل حنیف، سئیں صادق فدا، سئیں شوذب کاظمی،  سئیں عمران علی اعوان، سئیں وسیم ممتاز ایڈووکیٹ، سئیں مرتضیٰ زمان گردیزی، سئیں قاسم سہانی، سئیں نو بہار دولتانہ،  سئیں غفور بلوچ، سئیں راحت امیر تری خیلوی، سئیں عبدالرزاق زاہد، غلام اصغر ساہی،اشرف مشکور، ایم سلیم درباری،منظور سیال، سجاد ملک، ظفر ڈاہا،صابر انصاری، واجد تھلوی،شہزاد فیضؔ،زوار ذوقی،امجد شبیر امجد، سلیمان ساغر، فاروق بلوچ، کرامت رکسار،محمد علی باہوش،شاہدہ علوی وفا اور عابدہ نازش سمیت متعدد شعراء نے اپنْا کلام پیش کیتا