سرائیکی سہرے

اڄ دی تریمت حیاتی دے نویں پندھ تے ہولے ہولے اڳوں تے ٹُردی پئی اے ، اڄ دی طالبہ پڑھائی دے میدان وچ ٻہوں محنت کر تے اے ڳالھ منویندی نظر اَمدی اے جو ذہنی صلاحیتاں وچ او کہیں وی لیکھے مرد توں گھٹ کائنی پر شاعری تے ادب دے میدان دے وچ ہالی وی اوں کوں ٻہوں کجھ کرݨ دی لوڑھ ہے، جیکر اساں سرائیکی شاعری دی ڳالھ کروں تاں اڄ دی سرائیکی شاعری ، شاعری دے محسن سئیں دلنور نور پوری ٻہوں یاد امدن ، جیڑھے جو نینگر سرائیکی شاعراں دے نال نال نینگر سرائیکی شاعرات دے سر تے وی ہتھ رکھیندے ہن تے جو کجھ لائنا لکھ تے آوے ہا اونکوں پورا شاعر بݨا چھوڑیندے ہن۔ حوصلہ افزائی دے نال نال شاعری دی اصلاح کریندے ہن ، شاعری دے گُر تے رمزاں ݙسیندے ہن تے اَنت ہک ݙینھ اونکوں صاحب کتاب بݨا ݙیندے ہن، اڄ اساکوں ایجھی خدمت کرݨ آلا کوئی نی نظردا۔ شاعریں دی تھوڑ کائنی ، حوصلے تے ہمت دی ڳالھ اے ۔ میکوں یاد اے جو سئیں دلنور نور پوری جھوک اِچ میݙے ابے سئیں نال رَل تے کم کریندے ہن ، سرائیکی کتاباں چھپویندے ہن، کجھ شاعرات دیاں کتاباں وی ہوندیاں ہن، اساکوں پہلی واری پتہ لڳیا جو تریمتاں وی شاعری کریندن، پر اَساں جݙاں ایم اے سرائیکی کیتا تاں اے جٖاݨ تے ٻہوں خوشی تھئی جو تریمتاں سب توں زیادہ شاعری کریندین، سہرے لکھدین، دعائیں لکھدین، نعتاں تے منقبت لکھدین، پَر ارمان ہک ڳالھ دا ہے جو انہاں دا کلام دی آخر وچ تخلصؔ نی امدا جیویں جو شاعر حضرات دا اَمدے ۔ اساݙی دعا ہے جو تریمتاں ودھ توں ودھ لکھن تے شاعری اِچ انہاں دا وی ناں اُچا تھیوے۔

اے میݙی کتاب کوئی اتنی وݙی کتاب کائنی ، کجھ سہرے کٹھے کیتے ڳن، زیادہ تر لوک سہرے ہن، جنہاں دے بارے خیال اے ہے جو اے تریمت دی شاعری ہے ، کجھ سہرے اساݙے معروف شاعراں دے وی ہن، اساں اینکوں تریمت شاعری دا ناں ایں واسطے ݙتے جو خواتین کو احساس تھیوے جو سرائیکی ادب اِچ انہاں دا ٻہوں سارا حصہ ہے۔ ایں کتاب وچ غلطیاں ہوون تاں معافی چاہندی آں ، میں کوئی وݙی لکھاری کائنی ، بہاء الدین زکریا یونیورسٹی اِچ ایم فل دی طالب علم ہاں۔ میݙی پہلی کوشش اے میݙی رہنمائی کریسوتانجو اڳوں آوݨ آلا ایڈیشن ایں توں بہتر تھی سڳے۔

شائستہ ظہور

حوالہ

سرائیکی سہرے ، مرتب: شائستہ ظہور ، چھاپہ خانہ : جھوک پرنٹرز، ملتان