سرائیکی زبان وچ ذخیرہ الفاظ دی وسعت

سرائیکی بر صغیر دی ہک وݙی زبان ہے تے کہیں زبان دے وݙے ہووݨ دا اندازه اوندی ذخیره الفاظ دی وسعت توں لایا ویندے۔ سرائیکی زبان وچ ذخیرہ الفاظ دی تعداد ٻہوں زیادہ ہے جہیں دا اندازه ایں ڳالھ توں لایا ونڄ سڳدے جو سرائیکی وچ لفظ "اونٹ" کیتے ویہہ توں پنجھی لوظ ورتائے ویندن جیہڑے جو اوندی مختلف عمراں، جسمانی حالتاں تے جنس کوں بیان کریندن۔

•اُٹھ: عام طور تے استعمال تھیندے۔

•ݙاچی: اُٹھ دی مؤنث۔

•ٻہاݨ : اُٹھ دے نکے ٻال کوں آکھیا ویندے۔

•مارہا : سواری کیتے استعمال تھیوݨ آلے اُٹھ کوں آکھیا ویندے۔

•توݙا : جیہڑا اُٹھ بار چاوݨ یا سواری کرݨ دے کم آوݨ دے نیڑے ہووے اونکوں آکھیا ویندے۔

•توݙی : توݙے دی مؤنث

•لوارہ : نویں ڄمݨ آلے یا ہک سال دی عمر دے اُٹھ کوں آکھیا ویندے۔

•لواری : لوارے دی مؤنث۔

•کٹھیلا : ہک سال دی عمر دے اُٹھ کوں آکھیا ویندے۔

•مزات: ݙو سالاں دی عمر دے اُٹھ کوں آکھیا ویندے۔

•ترہاݨ : ترائے سالاں دی عمر دے اُٹھ کوں آکھیا ویندے۔

•لہاک : چار سالاں دی عمر دے اُٹھ کوں آکھیا ویندے۔

•دُوڳ: پنڄ سالاں دی عمر دے اُٹھ کوں آکھیا ویندے۔

•چھتر : چھی سالاں دی عمر دے اُٹھ کوں آکھیا ویندے۔

•چوڳا : سَت سالاں دی عمر دے اُٹھ کوں آکھیا ویندے۔

•چِھڳا : اَٹھ سالاں دی عمر دے اُٹھ کوں آکھیا ویندے۔

•پراف : ہک توں چار سال دی عمر دے اُٹھ کوں آکھیا ویندے۔

•نیش : جوان اُٹھ کوں آکھیا ویندے۔

•کھامبا : بݙھڑے اُٹھ کوں آکھیا ویندے۔

•کھپڑ : ٻہوں بݙھڑے اُٹھ کوں آکھیا ويندے۔

•جھروٹ: کھپڑ دی مؤنث۔

•چانڳا :چنڳے اُٹھ کوں آکھیا ویندے۔

•کریہل :ساوے رَن٘گ دا اُٹھ۔

دوستو ہک جانور کیتے ایݙے لوظاں دا ہووݨ زبان دی بلاغت و فصاحت اَتے وݙپ دا ثبوت ہے جیہڑا جو سرائیکی کوں دنیا دی ساری زباناں وچوں ہک بݨیندے۔

ضروری وضاحت:

کافی کوشش کرݨ دے بعد اَساکوں سرائیکی زبان وچ اُٹھ دے ایہ 23 ناں ملن۔ ایندے علاوہ وی اَساکوں کجھ لوظ ملن جیویں ضاگا وغیرہ پر اَساکوں اُنہاں لوظاں دا درست تلفظ تے معنی پتہ کائنا ہا اَتے ہُنائیں دے بارے وچ پَک کائنا ہا جو اوہ اُٹھ کیتے استعمال تھیندن نال اساں ای کوشش ای کیتی ہے جو یکے لوظاں دے درست معنی لکھوں جیکر کوئی غلطی تھئی ہووے تاں تساں اونکوں ٹھیک کر سڳدو۔ ایہ وی ظاہر ڳالھ جو سرائیکی زبان ہک ٻہوں وسیع زبان ہے ایندے علاوہ وی اُٹھ کیتے کجھ لوظ ہوسن۔ جیکر تہاکوں کجھ ٻئے لوظ وی اَمدن جیہڑے سرائیکی زبان وچ اُٹھ کیتے استعمال تھیندن تاں تساں اُنہائیں کوں اِتھ لکھ سڳدو۔