سرائیکی زبان تے سائنس دا علم

اساں ہک حیران کن دنیا تے وسدے پیوں،مُدقدیم کنوں انسان فطرت دے تماشئیں تے حیران تھیندا اندے۔ اے انسانی شعور دا کمال اے جو اپݨے علم تے سمجھ نال ہوں فطرت دے اصول تے قانون کوں کافی حد تک سمجھ گھدے تے اے سلسلہ اج تک جاری ہے۔

انسانی سوچ تے تجسس دا ہک مضبوط رشتہ اے۔ تجسس یا کھوج دے عمل نے انسان کوں سائنسی علم دے سفر اچ باکمال مقام تے پُڄا ݙتے۔ سائنس دے علم نال میݙی دلچسپی بچپن کنوں لا کے اڄ تک قائم اے۔ ایں لکھت دا مقصد سائنس دے کائناتی علم دی سادہ زبان اچ وضاحت کر تے عام لوکیں کوں سائنس دے ایں علم کوں سمجھݨ تے جدید سائنس نال انہیں کوں واقف کرݨ دے قابل بنڑاوݨ اے۔ 

کتاب ایں طرز اچ لکھی ڳئی اے جو سائنس کنوں لاتعلق شخص وی اینکوں پڑھ تے سائنس دی تاریخ، مختلف سائنسی نظریات تے کائنات نال واقف تھی سڳدے۔ تجسس دا مادہ تاں ہر ذہن اچ موجود اے۔ بھانویں او ذہن سائنسی علم نال واقفیت رکھیندا ہووے یا نہ، اے کتاب ہر شخص دے علمی ذوق کوں تسکین مہیا کریسی۔ ایں کتاب اچ کائنات دے بنیادی اجزا، قدیم سائنسدانیں دا کم، کائنات کوں سمجھݨ دے مرحلے، کائنات دا ذراتی ماڈل، نیوٹن، آئن سٹائن تے ہاکنگ دا کم تفصیل نال بیان کیتا ڳئے۔ آخری ݙو باب جدید سائنس تے مستقبل دی سائنس دے بارے واقفیت فراہم کریندن۔ میں اتھاں باب نمبر ' 5 ' دا خصوصی تذکرہ کریساں جیندے وچ عظیم سائنسدان آئن سٹائن دے نظریات، تے اْنیں نظریات دا عام زندگی، ادب تے وقت دی حقیقت  نال تعلق سادہ زبان اچ ڈسکس کیتا ڳئے۔ ایں باب کوں ایں کتاب دا 'دل' آکھیا ونڄ سڳدے۔

سرائیکی قدیم، مٹھی تے من بھاوݨی ٻولی اے۔ سرائیکی زبان اچ کافی سارا ادبی لٹریچر، ݙوہڑہ، کافی، نظم، آزاد نظم، لوک گیت، ڈرامہ، ناول وغیرہ دی شکل اچ موجود اے۔ سائنسی نثر دی کمی ڈھیرمُد کنوں محسوس کیتی ویندی پئی ہئی۔ میں ایں ڳا لھ تے فخر کرینداں جو اے کتاب سائنسی نثر اچ سرائیکی دی پہلی کتاب اے تے ایں کتاب نال بلاشبہ سرائیکی ہک سائنسی زبان بݨ ڳئی اے۔ اے کتاب ثابت کریندی اے جو ساݙی مٹھی ٻولی سرائیکی اچ اے خاصیت ہے پئی جو جدید ترین علم کوں وی سرائیکی اچ بیان کیتا ونڄ سڳدے۔اے کتاب سچ دا سفر اے تے سائنس سچ دے ایں سفر دی پاندھی اے جیویں جو عظیم بُدھا آکھیا ہا "ترے چیزاں زیادہ دیرنئیںلُک سڳدیاں____  سجھ،چندرتے سچ۔

ایں کتاب کوں مکمل کرݨ دے کم اچ سب توں پہلے میں عزیر راجو دا شکریہ ادا کرینداں جئیں ایں کتاب کوں کمپوز کیتے تے اڄ اے کتاب تواݙے سامݨے ہے۔ مزید میںانیں دوستیں دا شکرگزار ہاں جیندا تعاون ایں کتاب دی تیاری اچ ہر لمحہ میݙے نال رہ ڳئے۔

عاشق خان بزدار، عبدالباسط بھٹی، نواب مسیح اللہ خان گورچاݨی، عبدالسمیع مجاز، صوفی تاج خان گوپانگ، منظور خان دریشک، محبوب تابش، رؤف خان لنڈ ،ذوالفقار خان بزدار، نزاکت خان بزدار، قسور خان بزدار،شاکرخان بزدار،پروفیسر سبطین یاسر، جنید بزدار،مجاہد کلاسرہ،جاوید نعیم خان بزدار، واجد خان بزدار،ناصر خان بزدار، ضیاالدین خان بزدار، ملک شوکت محمود ماڑھا،جواد جوجی،اختر خان گوپانگ، شاہنواز شکیب لاشاری، رزاق سالک، عثمان کریم بھٹہ، ملک عمار یاسر، حق نواز عاقب، جاوید آصف، ملک خالد مڑل، ذبیح اللہ خالد، محسن کلاسرہ،آصف لغاری ، عمر خاں بزدار،ملک اسحاق، فیاض خان کورائی، شاہنواز خان دریشک،چوہدری عمر زمان، علی اختر بخاری ،فلک شیربزدار ،بلخ شیربزدار ، شہباز خان بزدار، امتیازخان بزدار، ملک سلیم انور، ملک سلیم الطاف،خواجہ باسط فرید، میاں شوکت حسین، شوکت عمران بخاری، سیف اللہ بھٹی، انعام اللہ بھٹی، امر نواز خان بزدار، وسیم خان بزدار،عدنان خان بزدار،سلمان خان بزدار، ڈاکٹر عباس تونسوی، آصف سیماب، فاروق خان گوپانگ ،مجتبیٰ دستی، علی رضا، قیصر اعوان، بلال اعوان ،طاہر مگسی،فاروق کھوکھر، عبدالمالک بزدار، محمد امین ببر،علی رضا چانڈیہ،ضامن عاقب۔

بپتسٹ ہمنل سانگ[BAPTIST HYMNAL SONG] دی ایں دعا نال میںاپݨی ڳالھ مکینداں:

’’خدا کرے میݙا اے کم میݙی پہچان بݨے!‘‘

جعفر عباس بزدار

مہرے والا

یکم جنوری 2021

حوالہ

کتاب: کائنات دا سفر ، مصنف : جعفر عباس بزدار ، ناشر: جھوک پبلشرز ملتان