سرائیکی تحریک دا المیہ

سرائیکی تحریک دا المیہ

لکھت: ارشد لاشاری

سرائیکی صوبہ تحریک خیر نال ادھ صدی دا پندھ کر چکی ھے اپݨی اݨڳݨت قربانیاں تے محنت نال پنج کروڑ تو ودھ لوکیں کو ھک انج قوم دا درجہ ݙیوݨ ءچ سو فیصد کامیاب رھئی ھے،

ولا کیا ڳالھ ھے جو اے تحریک او مقاصد حاصل نی کر سکی. جیندا خاب اساݙے وݙکیاں ݙٹھا ھا، آو اڄ ولا کجھ اپݨی تحریک دی کمزوریاں دے دید بھوانو، تے اینکوں کھلے دل تے دماغ نال تسلیم کروں،

1 تحریک دے مقاصد ءچ ناکامی دی وݙی وجہ اے ھے جو تحریک ءچ قومی آبادی دا پنجاہ فیصد خواتین دا کردار تقریباً محدود ھے، وݙے تو وݙا قوم پرست اڳواݨ وی اپݨے گھر دی تریمتیں کو سرائیکی تحریک ءچ شامل تھیوݨ دی حوصلا شکنی کریندے، جیکر کئی دھی بھیݨ ہمت کر تے تحریک دا حصہ بݨ ای ویندی ھے تاں اساݙا مردانہ مزاج مطابق اوندا کردار ھک نمایش. تک محدود کر ݙتا ویندے،

2 سرائیکی تحریک ھالی تک لوئر کلاس عوام تئیں محدود ھے، مڈل کلاس دا بندا جیکر شامل تھیندا ھے تا ڈائریکٹ اڳواݨ بݨ ویندے تے اپر کلاس دے لوک تاں ایوںں بھڄدن جو متاں ایمان خراب تھی ونڄے،

3 سرائیکی تحریک دا بدترین المیہ اے ھے جو تحریک ءچ کارکن گھٹ تے اڳواݨ زیادہ ھن، وسیب دے ھر علاقے ءچ ھر چنگا قوم پرست اپݨے چار پنج بندے رلا تے کئی نا کئی سرائیکی پارٹی بݨائی ودے،

4 سرائیکی تحریک دا ھک جھنڈا تے ھک ایجنڈا ناں ھووݨ وی اساݙی وݙی بدقسمتی ھے، چلو جیکر کوئی بندا اپݨی انج پارٹی بݨا وی گھندے تا کم از کم سرائیکی دا جھندا تا ھک رکھے،

5 اساݙی تحریک دے موجودہ زیادہ تر اڳواݨ پیراشوٹ نال تحریک ءچ لتھے یا لاتھے ڳن، جنھاں دا مقصد تحریک کو انگیج کرݨ دے علاوہ نوجوانیں کو بدظن کرݨ وی ھے،

6 اڄوکی سرائیکی تحریک ءچ تنظیم سازی یا سیاسی تربیت دی بجاے میوزیکل پروگرامیں تے توجہ زیادہ تھی ڳئی ھے

اڳلی قسط دا انتظار کرݨ دی درخواست