سرائیکی بنک

اعلان دے باوجود سرائیکی بنک کیوں نی بݨایا گٖیا ؟ اے ہک ایجھی وانجھ اے جیندا ہر جاہ تے ذکر ہووݨا چہیدے ، ایں توں پہلے اے ݙسݨ چہنداں جو وسیب دا ہر بندہ جݙاں وی بنک ونجٖے تاں ݙیکھے جو ایندے وچ سرائیکی نال کتنی وانجھ تھیندی پی اے ۔ سرائیکی شناخت دے کیرھے دشمن ءِ ن ، جنہاں پنجاب بنک تاں بݨائے ، سرائیکی بنک کیوں نی بنڑݨ ݙتا؟

جیویں جو میں پہلے آکھ آیاں جو کہیں ہک بنک دا وی ہیڈ آفس سرائیکی وسیب ءِ چ کینھی، ایں ویلھے پنجٖاہ دے نیڑے تیڑے بنک کم کریندے پن ، انہائیں وچ بنک آف پنجاب ، بنک آف خیبر، بولان ، مہران یعنی سندھ ، بلوچستان وی ہن، جیکر کینھی تاں سرائیکی بنک کینھی۔ سرائیکی بنک بݨاوݨ دا اعلان محترم آصف زرداری صدر پاکستان دی حیثیت نال وزیراعظم پاکستان محترم یوسف رضا گیلانی دے گھر بٖہہ تے کیتا پر سرائیکی بنک اڄ تئیں نی بݨ سگٖیا۔ پیپلزپارٹی اپݨے دور اقتدار ءِ چ چار سال سرائیکی صوبہ سرائیکی صوبہ دا دول وجٖایا پر او وی نہ بݨیا تے نہ ای اوندے واسطے کوئی سنجیدہ کوشش تھئی۔ پچھو تاں آکھدن جو اساکوں اسمبلی وچ ݙو ترہائی اکثریت حاصل نہ ہئی۔ میں آکھداں چلو سرائیکی صوبے سانگے تاں اسمبلی ءِ چ ݙو ترہائی اکثریت دی لوڑ ہئی ، کیا سرائیکی بنک سانگے وی ݙو ترہائی اکثریت دی ضرورت ہئی؟ اساں آکھدوں پیپلز پارٹی آلئیں او کم وی نی کیتے جیندے کیتے انہائیں کوں کہیں دی متھاجی نہ ہئی۔ اساں گٖالھ بنکیں دی کریندے پے ہاسے ، ایندے وچ سرائیکی وسیب دے لوکیں کوں پورا پورا حصہ تے حق چہیدے ، کیونجو انہاں بنکاں کوں بنک بݨاوݨ ءِ چ سرائیکی وسیب دا پورا پورا حصہ ہے۔

اساں آکھدوں بنکیں دے کلیدی عہدے سرائیکیں کوں وی ݙتے ونجٖن ۔ بٖاہرلے ملکیں وچ جیرھیاں برانچاں ہن، انہائیں وچ سرائیکی وسیب کوں آبادی دے مطابق برابر ملازمتاں ݙتیاں ونجٖن۔ بنکیں دے ہیڈ آفس سرائیکی وسیب ءِ چ وی بݨائے ونجٖن۔ بنک جیرھے قرضے سیاسی بنیادیں تے جاری کر تے ولا معاف کریندن، ایں ڈھکوسلے کوں بند کر تے بنک سرائیکی وسیب دی محرومی پسماندگی تے بے روزگاری مُکاوݨ سانگے صنعت کاری خصوصاً گھریلو صنعتاں لاوݨ سانگے مقامی لوکیں کوں قرضہ ݙیون ۔ بنکیں سرائیکی وسیب دے محروم علاقے دی رت نپیڑ گھدی اے ۔ بنکیں آلے اے نہ سمجھن جو وسیب دے لوک بودن تے بھکن اِن تے جیویں مرضی آؤسے انہائیں کوں لُٹی پُٹی آؤسوں ۔ وسیب دے لوکیں خصوصاً نینگریں کوں انہائیں دے حق حقوق نہ ملئے تاں وسیب دے لوک اپݨے حق کھسݨ تے آویسن تے ولا کرنسی نال بھریاں پلیت گاݙیاں سرائیکی ماء دھرتی دے پاک سینے کوں داپھ تے اگٖوں تے نہ لنگھ سگٖسن۔ بنکیں آلے سرمایہ داریں کوں جے ایں گٖالھ دا پتہ نہ ہووے تاں او دنیا دی تے خاص کر انہائیں ملکیں دی تریخ پڑھن جتھاں سود خور غریب تے مجبور لوکیں دا استحصال کریندے ہن تے جݙاں ظلم دے خلاف لوک اُٹھیے تاں انہائیں دا سرمایہ تے کیا او آپ نہ بچئیے ۔

بنکیں دے سارے وݙے عہدے ہندوستانیں توں آوݨ آلیاں کوں ݙے ݙتے۔ دھرتی دے اصل وارث کوں تُساں کمی تے شودر بݨا ݙتا ، ساریاں کھیݙیاں تُساں لسانی تعصب تے تنگ نظری دی بنیاد تے کھیݙیاں۔لسانی تعصب ،کینہ پروری ، تنگ نظری ، ہیرا پھیری ، کھوٹ ، مکر فریب، اے سارے کنڈے تُساں آپ کھنڈائن۔ اجٖاں وی آکھدو سرائیکی تعصب کریندن تے صوبہ منگدن ؟ تعصب کون کریندے تے تعصب دی بنیاد تے کئیں ، کہیں دا کتنا حق ماریئے ؟ آؤ حساب کرو ،ملازمتاں بھاویں بنکیں دیاں ہوون تے بھاویں کہیں بٖئے محکمیں دیاں، آبادی مطابق تُساں اپݨا حصہ گھنو تے جیرھا میݙے وسیب دا حصہ ہے ، میݙے وسیب دے نینگریں کوں ݙیو۔ بھلا اے ݙسو! کیا جݙاں پاکستان بݨیا ہا اے شرط تاں نہ مُکی ہئی جو سرائیکی تہاݙے نوکر بݨسن تے تہاݙیاں میزاں صاف کریسن ۔اساݙیاں مَیریں بھیݨیں تہاݙے تھاں منجیسن ۔ تہاݙے فرشیں کوں پوچے مریسن تے اپݨے بٖال روندے چھوڑ تے تہاݙے تے تہاݙے بٖال رہیسن تے انہائیں دے گندے کپڑے دھوسن ؟ جے قائد اعظم ایجھی کوئی شرط اسیݙے وݙیں کنوں لکھوائی ہئی تاں اسیکوں ݙکھاؤ نہ تاں دروہ، دلاپ تے ٹھگٖی بند کرو تے میݙے وطن وسیب دے نینگریں کوں اوندا حق ݙیو ، نہ تاں اپݨیاں بنکاں اتھوں پٹو تے اپݨے گھر ونڄ چا ونجٖو ۔ تہاکوں چتویندے پیوں سرائیکی قوم کوں اوندا پورا پورا حق ݙیوݨا پوسے ، اے حق آرام نال ݙے ݙیو ، جے ݙڈھپ کریسو تاں سرائیکی نینگر شر کریسے ، ذمہ دار آپ ہوسو ۔ سرائیکی بنک وی صدر پاکستان دے اعلان دے مطابق بݨاؤ ، اے اعلان صدر پاکستان دا ہا ، ایرے غیرے نتھو خیرے دا نہ ہا ۔ منصب دے بٖیٹھے ہوئے کہیں شخص دا اعلان منصب دا ہوندے ، شخص دا نی ہوندا، لہٰذا تُساں وی منصب چھوڑو یا منصب دی لاڄ رکھو ۔

حوالہ

معروف سرائیکی لکھاری سئیں ظہور احمد دھریجہ دی کتاب (سرائیکی اجرک) وچوں چوݨ