سرائیکی الا ٻول تحریک دا مقصد

سرائیکی زبان ساݙی ثقافت، تہذیب تے شناخت دا اہم حصہ ہے۔ سرائیکی الا بول تحریک دا مقصد ایہ ہے جو اساں اپݨی مادری زبان سرائیکی کوں گھر دے ماحول اچ فروغ ݙیووں تے اپݨے بالیں کوں ایں زبان نال جوڑے رکھوں۔ ایں سانگے، اساں ایہ عہد کریندے ہیں جو:

1. گھر اچ سرائیکی ڳالھ مہاڑ کریسوں: اساں اپݨے روزمرہ دے کم کاج اچ سرائیکی زبان دا استعمال کریسوں تے بالیں نال وی سرائیکی اچ ڳالھ مہاڑ کریسوں۔

2. بالیں کوں سرائیکی سکھیسوں: اساں اپݨے بالیں کوں سرائیکی ڳاوݨ، کہاݨیاں تے لوک ڳیت سݨائیسوں تاں جو اوہ ایں زبان نال جُڑے رہن۔

3. سرائیکی ثقافت نال جوڑیسوں: اساں بالیں کوں سرائیکی رسم و رواج، تہوار تے ثقافتی تقریبات نال متعارف کرویسوں۔

4. سرائیکی زبان دی اہمیت سمجھیسوں: اساں بالیں کوں ایہ سمجھیسوں جو سرائیکی ساݙی مادری زبان ہے تے ایں دا احترام تے فروغ ساݙی ذمہ داری ہے۔

5. سرائیکی ادب تے شاعری نال روشناس کرویسوں: اساں بالیں کوں سرائیکی شاعری، کہاݨیاں تے ادب پڑھ کے سݨائیسوں تاں جو اوہ ایں زبان دی خوبصورتی سمجھ سڳن۔

6. سرائیکی زبان کوں فخر نال اپنائیسوں: اساں اپݨے بالیں کوں ایہ سکھائیسوں جو سرائیکی بولݨ اچ کوئی شرم نہیں، بلکہ ایہ ساݙی پہچان تے فخر دا باعث ہے۔

اساں ایں عہد نال اپݨی نسل کوں سرائیکی زبان نال جوڑݨ تے ایں دے فروغ کیتے اپݨا کردار ادا کریسوں۔ سرائیکی ساݙی ماء بولی ہے تے اساں ایں کوں زندہ رکھݨ دا عہد کریندے ہیں۔ اورنگزیب اورنگ بغلانی دامان علاقہ پچادھ چوٹی بالا سرائیکی زندہ باد