سرائیکی اجرک دی تاریخ

ظہور احمد دھریجہ دے حصے اِچ ڈھیر سارے کم آئن پر ہک ٻہوں وݙا تاریخ ساز کم سرائیکی ثقافت دے حوالے نال سرائیکی اجرک وی ہے۔ ایں کم کیویں تھیاں کیا کیا مشکلاں پیش آئن۔ ایں سارے معاملے دی تریخ بیان کرݨ ضروری اے۔

ظہور احمد دھریجہ دی عظیم خدمات دے وچ ہک وݙی خدمت سرائیکی اجرک دا متعارف کراوݨ وی ہے۔ سرائیکی اجرک ہک ٻہوں وݙے انقلابی قدم دے طور تے سامݨے آئی اے، ایندے وچ کوئی شک نی جو سرائیکی تحریک اِچ سرائیکی اجرک ہک نواں موڑ ہا ۔سرائیکی اجرک دے آوݨ نال وسیب کوں شناخت تے طاقت ملی اے ۔ وسیب دے لوکاں اجرک کوں خوشی نال قبول کیتے ۔ سرائیکی اجرک دے بانی ظہور احمد دھریجہ ہِن ۔6مارچ 2014ء کوں اُنہاں سرائیکی اجرک متعارف کرائی ۔ جیرھی جو ݙیکھدے اِی ݙیکھدے ہر پاسے پُڄ ڳئی ۔سرائیکی دی تاریخ کیا ہے ظہور احمد دھریجہ کوں سرائیکی اجرک دا خیال کیویں آیا ،سرائیکی اجرک دی تیاری اِچ کتنیاں مشکلاں پیش آیاں ۔ اے سارا حال حویلہ اپݨی کتاب سرائیکی اجرک اِچ لکھیے۔ آپ لکھدن جو :

سندھی اجرک بسم اللہ ! پر وسیب دی سنڄاݨ اسیݙی اپݨی ہووے ، نت فکر رہندی ہئی۔ سرائیکی اجرک دا خیال میکوں ہِک مُد کنوں ہا۔ میں فریدی رومال کوں عام کرݨ دے نال اینکوں اجرک اِچ تبدیل کرݨ بارے وی کوشش کیتی ۔ ایں سلسلے اچ میں کراچی ڳیا ، کپڑے دی وݙی مارکیٹ اِچ انہائیں وپاریں کوں ملیا جیرھے فریدی رومال تھوک تے ویچیندن۔ میں انہائیں کوں آکھیا جو فریدی رومال کوں وݙا کر تے ایندی اجرک بݨوا ݙیو۔ انہاں آکھیا کوئی مسئلہ کائنی پر کم از کم تُساں ہک ہزار چوکڑی دا آرڈر ݙیو ۔ میں سنگتیں تے دوستیں نال صلاء کیتی ، میکوں سارے آکھن ٹھیک اے ، اسیݙی اپݨی سنڄاݨ ہووے ، پر میکوں ہک ڳالھ دا وپرا ہا جو فریدی رومال کوں آیا ݙوجھے مسلک آلے قبول کریسن یا نہ کریسن ؟ جیکر نہ کیتا تاں اے سرائیکی دی قومی سنڄاݨ نہ بݨ سڳسے ۔ میکوں جیرھا وِپرا تے وسواس ہا او 21 فروری 2012ء کوں جناح ہال خانپور ماء ٻولی دے کٹھ اچ سامھے آیا۔ سئیں نور تھہیم سٹیج تے آوݨ آلے سارے مزمانیں کیتے فریدی رومالیں دا اہتمام کیتا۔ بسم اللہ تھئی۔ تلاوت کرݨ آلے دے ڳل وچ فریدی رومال پوایا ڳیا، اوں لہا چھوڑیا، ولا پوایا ڳیا، اوں ولا لہا چھوڑیا ۔ تقریب مُکݨ تے میں اوں توں پُچھیا تاں مولوی صیب جواب ݙتا جو اے بریلویں دی نشانی اے ، میں دیو بندی آں۔ میکوں ڳالھ دی سمجھ آ ڳی ۔ میں سوچ گھدا جو فریدی رومال کوں اجرک بݨاوݨ آلا منصوبہ کامیاب نہ تھیسے ۔کیونجو اساں ایہو جہی نشانی چہندوں جیندا تعلق دھرتی تے ثقافت نال ہووے تے اینکوں سارے فرقے تاں کیا وسیب اِچ رہݨ آلے ہندو ، مسلم ،عیسائی سب خوشی نال پاون تے خوشی نال ٹھمکاون ۔ میں فیصلہ کیتا جو سرائیکی اجرک بݨوائی ونڄے تے ایندے واسطے کم شروع کیتا ونڄے ۔ سرائیکی اجرک سانگے ڈیزائن شروع کر ݙتے ڳے۔ کمپیوٹر تے کجھ ڈیزائن بݨائے ڳے تے انہائیں کوں فیس بک تے وی لاتا ڳیا۔ دوستیں پسند کیتا تے کجھ تجویزاں آیاں۔

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی