سخی سرور تے دانی ڄٹّی

SAKHI SARWAR AND DANI JATTI

(اِیکوں 1879ء اِچ مسز ایف ۔ اے ۔ سٹیل کیتے فیروز پور وچ ہک منشی ریکارڈ کیتا)

(ترجمہ) ایہ ہِک جدید حکایت ہے ۔ جیندے بارے اڄوکے لکھاری ضلع فیروز پور دے علاقے (دیہات) لانڈیکے دے نمبردار سربراہ نال ڳالھ مُہاڑ کیتی ہے جیندا دعویٰ ہے جو اوہ اُوں چُھوہر دا پُتر ہے جیکوں سرور نے دانی لئوں مُردے کنوں زندہ کیتا ہا ۔ اوہ ہک سِدّھو ڄٹ ہا ۔ حکایت دا مصنف یا ریکارڈ کنندہ نہالا ہا جہڑا ہک بھرائیں ہا  یا ایں داڄاݨو ۔جو اوہ سخی سرور دی شان وچ ڳاوݨ آلا پیشہ ور گائیک ہا ۔ سیّد احمد سخی سرور لکھ داتا جیکوں عام طور تے سرور آکھیا ویندے ‘ پنجاب دا ٻہوں مقبول جدید صوفی ہے۔ اوہ ہک معروف ولی ہے تے تارک الدنیا لوکاں دے اوں طبقے نال تعلق رکھدے جہڑا اِتھاں 11ویں تے 12ویں صدی عیسوی اِچ ملتان دے نواح اِچ آن آباد تھیا ۔ سرور آپ تیرھویں صدی اِچ کتھائیں ونڄ اُبھریا ۔ اُنہاں دی خنگاہ نگاہا ضلع دیرہ غازی خان وچ کوہ سلیمان دے دامن وچ درّہ سخی سرور دے مونہ دے اُتّے ہے ۔ ایں مقام توں اندازہ تھیندے جو سخی سرور کہجیں پُر مشقت حیاتی گزاری ہوسی ۔ کیوں جو ’’ایہ آخری جاء ہوسی جیکوں کُئی آپݨاں ذاتی اَرام سکون چھوڑ کے ‘ رہݨ کیتے منتخب کریسی ۔ ہر وساکھ (اپریل۔ مئی) وچ اُتھاں ہک وݙا میلہ لڳدے جیندے وچ ہر طبقے دے لوک پنجابی‘ ہندو ‘ مسلمان تے ٻئے لوک شریک تھیندِن ۔ خنگاہ دی نگرانی موروثی طور تے مجاور یا خُدام کریندِن یا ٹُردے پِھردے بھرائیں کریندِن یا نَٹ کریندِن جہڑے اُنہاں دی تعریف اِچ ٹاہراں ڳاندِن اَتے ہر پاسوں دے زوار کٹھے کریندِن ۔ اُتلیاں جائیں کنوں علاوہ سرور دا ذاتی تعلق لاہور ‘ گوجرانوالہ تے گجرات ضلعیاں دے ٻنہاں پاسیاں نال وی ہے ۔

سن 1879ء

کاتب ہک منشی

مقام فیروزپور

سامع مسز ایف ۔ اے سٹیل

شاعر نہالا (بھرائیں)

٭

حوالہ

وسیبی قصے، ترجمہ /لکھت وٹاندرا :  شوکت مغل ، چھاپہ خانہ : جھوک پرنٹرز ‘ ملتان