سخی راضی فقیر

آپ دا ناں محمد حسن ہئی تے آپ راضی فقیر صوفی دے ناں نال مشہور ہن۔ آپ سائیں کریم بخش دے گھر 1920ء وچ پیر ڳوٹھ میر پور سندھ وچ پیدا تھے۔ آپ اپݨے مرشد حضرت کرم اللہ شاہ گھوٹکی والے کنوں تعلیم و تربیت تے روحانی فیض حاصل کیتا۔ آپ حافظ قرآن وی ہن۔ ہر وقت عبادت تے ریاضت وچ رہن ہا۔ سادگی تے ہمدردی آپ دی سُنڄاݨ ہن۔ آپ دا سرائیکی دیوان ’دردِ عشق‘‘ فروری 1968ء وچ شائع تھے۔

کافی

ذکر اللہ دا نور نزول

باقی باتاں سب فضول

آپ کولوں جݙ ہوویں فانی

تیرا تیں وچ ٻولے جانی

ہر جا نظرے ذات حقانی

وحدت اندر کر وصول

مرشد میکوں سُر سمجھایا

عشق اساݙے حصے آیا

ظاہر باطن ہکو پایا

آپے کیتا یار قٻول

کتھے مومن کتھے کافر

کتھے یونس کتھے صابر

کتھے احمد علی حیدر

راضی ہویا رب  رسول

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان