سخی دھرتی دے سخی لوک

سرائیکی وسیب سخی لوکیں دی دھرتی اے ، وسیب دے لوک مہمان نواز اِن ، مہمان نوازی دے چرچے تہاکوں جاہ جاہ ملسن، مہمان نوازی سخی لوک کریندن ، خواجہ فریدسئیں آپ وی سخی ہن تے اپݨے مریدیں کوں وی سخی بݨا ݙتا ، خواجہ سئیں کوں نذرانے ملدے آپ ونڈا ݙیندے، بعض ضرورت مندیں کوں اتنا ݙیندے جو سال دا خرچ پورا تھی ویندا۔ لنگر اِچ مݨیں دے حساب نال اَٹا پکدا، غریب مسکین ، یتیم تے بیوگان تے غریب طالب علمیں دے ماہوار وظیفے مقرر ہن۔ ہک واری خواجہ سئیں سخاوت کریندیں ویلے ٹھڈی آہ بھری تے فرمایا جو افسوس! میں توں اڄ تئیں کہیں سوالی لکھ روپیہ نی منگیا ، کوئی سوال کرے ہا تاں فقیر پورا کرے ہا۔ اے ہے سرائیکی دھرتی تے سرائیکی دے لوک ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء